Xitay saqchiliri saxta kimlik bilen oqughuchi mutellip iminni paylimaqta

Tünügün yeni 10-noyabir küni xotende nezerbend astida yashawatqan oqughuchi mutellip iminni xitay saqchiliri saxta kimlik bilen izdigen.

Mutellip iminning bu heqte Uyghurbiz tor bétide élan qilghan tesirat maqaliside bayan qilishiche, özini wilayetlik diniy ishlar bashqarmisidin dep tonushturghan ikki neper xadim, mutellip imin olturushluq mehellining kent ahaliler komitétigha kirip mutellip imin bilen körüshüsh arzusi barliqini éytqan we mutellip öyide bolmighachqa, uning bilen körüshelmigen.

Bu xadimlar kent kadirigha mutellipning téléfon qayturushini hawale qilip kenttin ayrilghan. Mutellip imin ikki neper xadim qaldurghan téléfon nomurning 9 xanisining aldinqi 7 xanisining özi bilidighan saqchi xadimlirining téléfon nomuri bilen oxshashliqini bayqighan, mutellip ularning diniy ishlar bashqarmisining xadimi ikenlikidin gumanlan'ghan. U diniy ishlar bashqarmisigha téléfon qilghinida, qaldurulghan kimlik kartushkisidiki namda xadim yoqluqi ashkarilan'ghan.

Melum bolushiche, magistir mutellip imin oquwatqan istanbul uniwérsitétidin qaytip kélishning aldida, özini ma'arip bashqarmisidin dep tonushturghan ikki neper xadim؛ uning a'ilisidin mutellip iminning uchurlirini sorighan, emma mutellip imin yurtigha qaytip kelgen we béyjing ayrodromida tutqun qilinip 3 aygha yéqin ürümchide qanunsiz tutup turulghan jeryanda uni izdepmu qoymighan.