Бу йиллиқ нобел тинчлиқ мукапати ядро қораллириға қарши бир тәшкилатқа берилди

Мухбиримиз әркин
2017-10-06
Share

Норвегийә нобел комитети бүгүн 2017‏-йиллиқ нобел тинчлиқ мукапатиниң ядро қораллириға қарши турушни нишан қилған бир хәлқаралиқ тәшкилатқа берилгәнликини елан қилди. Бу йиллиқ нобел тинчлиқ мукапатиниң хәлқарада анчә нами чиқмиған бир органға берилиши кишиләрниң ойлимиған йеридин чиққан.

Ройтерс агентлиқиниң хәвәр қилишичә, бу йиллиқ мукапатниң "хәлқара ядро қораллирини бикар қилиш һәрикити" намлиқ бу органға берилиши, дуняда ядро уруш тәһдитиниң күчийиватқанлиқи вә ядро қораллириниң шималий корейәгә кеңийишигә қарита берилгән бир агаһландуруш икән.

"хәлқара ядро қоралларни бикар қилиш һәрикити" 2007‏-йили австрийә пайтәхти веанада қурулған аммиви тәшкилат болуп, у дунядики 100 дин артуқ дөләттә йилтиз тартқан бир хәлқара бирләшмә икән.

Норвегийә нобел комитетиниң рәһбири берит реис андерсон бүгүн елан қилған баянатида, "биз ядро қораллириниң ишлитилиш хәвпи техиму күчәйгән бир дуняда яватимиз. Бәзи дөләтләр өзиниң ядро қораллирини илғарлаштуриватиду. Йәр шарида шималий корейәгә охшаш техиму көп дөләтләр ядро қораллириға еришишкә урунуштәк бир реал тәһдит мәвҗут," дегән.

"хәлқара ядро қораллирини бикар қилиш һәрикити" ниң директори бетрис фин бүгүн ройтерс агентлиқиға бәргән баянатида, "ядро тәһдити селиш, ядро қораллириға игә болуш, униңға еришиш вә уни тәрәққий қилдуруш қанунсизлиқтур, " дегән.

Бу мукапат шималий корейә арқа-арқидин ядро синақлирини елип берип, америка билән ядро тоқунуши пәйда қилған шундақла америка һөкүмити 2015‏-йили иран билән имзалиған ядро келишимини бикар қилидиғанлиқиға даир хәвәрләр тарқалған мәзгилдә мәзкур органға берилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт