Her qaysi ellerdiki Uyghurlar 2022-yilliq noruz bayrimini daghdughuluq kütüwaldi

Dunyaning herqaysiy elliridiki Uyghurlar 2022-yilliq noruz bayrimini her xil pa'aliyetlerni ötküzüp, daghdughuluq kütiwaldi. Amérika, kanada, fransiye, shiwétsiye, norwégiye gollandiye qatarliq döletlerdiki Uyghurlarning noruz bayrimini kütiwélish pa'aliyetliri mol mezmunlarda élip bérilghan bolup, Uyghurlarning noruz en'eniliri, milliy kiyim-kéchiki, drama, naxsha-ussul sen'iti we bashqa mezmunlar körsitilip, birlik we ümidwarliq rohi namayen qilin'ghan. Amérikadiki Uyghurlarning noruz pa'aliyiti 19-mart küni amérika Uyghur birleshmisining orunlashturushida wirjiniye shtatida daghdughuluq ötküzülgen.

Birqanche yüz kishi qatnashqan bu noruz pa'aliyiti sherqiy türkistan marshi we du'a bilen bashlinip, naxsha-ussul, muzikilar arqiliq Uyghur tili hem medeniyitining güzelliki we xasliqi nayamen qilin'ghan. Bolupmu “Méhriban ana Uyghur tili mektipi” ning oqughuchiliri orundighan “Atush senimi” qatarliq nomurlar alahide alqishqa érishken. Pa'aliyetke yene amérikaning NBA baskétbol cholpini enes kenter frédommu qatniship söz qilghan. Uyghurlargha qilghan xizmiti üchün uninggha mexsus longqa teqdim qilin'ghan.

Kanada'iki noruz pa'aliyiti 20-mart küni “Kanada sherqiy türkistan jemiyiti” ning orunlashturushida kanadaning toronto, kalgari, montériyal, wankowér qatarliq sheherliride ötküzülgen. Torontodiki pa'aliyetmu sherqiy türkistan marshi bilen bashlinip, shé'ir déklimatsiye qilin'ghan, naxsha-ussul qatarliq sen'et nomurliri orundalghan.

Fransiyediki noruz pa'aliyiti parizh shehridiki bir zalda ‍ötküzülgen bolup, “Yawropa ‍uyghur inistituti” ning orunlashturushidiki pa'aliyetke bir qanche yüz kishi qatnashqan. Pa'aliyette “Parizh ana til mektipi” oqughuchilirining orundishida ésil sen'et nomurliri körsitilish bilen bir waqitta, yawropadiki bashqa döletlerdin kelgen Uyghur sen'etkarlar en'eniwi naxsha-ussul, muqam qatarliq sen'et nomurlirini teqdim qilip, méhmanlarning qizghin qarshi élishigha érishken.

Noruz bayrimi Uyghurlarning ming yillardin béri tebriklep kéliwatqan muhim milliy bayrimi, shundaqla Uyghurlarning turmush aditide intayin chong tesirge ige Uyghur medeniyitining bir parchisidur. Lékin noruz bayrimini ‍öz ichige alghan Uyghur mediniyiti xitayning éghir buzghunchiliqigha uchrawatqan bügünki künde, muhajirettiki Uyghurlar noruz bayrimini daghdughuluq kütiwélip, bu arqiliq Uyghur medeniyitini qoghdash, janlandurush we namayen qilish wezipisini üstige almaqta.