Özbék yash seyfulla se'ipof nyu-yorkta élip barghan térrorluq hujumida 8 kishini öltürgen

Muxbirimiz irade
2017-11-01
Élxet
Pikir
Share
Print

Amérikigha 2010-yili özbékistandin kélip qanunluq yerleshken 29 yashliq seyfulla se'ipof seyshenbe küni nyu-york shehiride térrorluq hujumi élip bérip, 8 ademning ölüshi we nurghun kishilerning yaridar bolushini keltürüp chiqardi.

S n n ning xewirige qarighanda, seyfulla se'ipof seyshenbe küni chong mashinidin birni ijarige élip, bu mashina arqiliq nyu-york shehiri ichidiki yoluchilar we wélisipit mangidighan yolgha bösüp kirip, udul kelgen ademlerning hemmisini öltürüshke urun'ghan. Netijide, atalmish "Islam döliti" ning namida élip bérilghan bu hujum jeryanida 8 adem ölgen we nurghun kishiler yaridar bolghan.

Nyu-york saqchiliri uninggha oq chiqirip yaridar qilghandin kéyin tirik qolgha chüshürgen. S n n ning bildürüshiche, bu qétimqi térrorluq hujumi "11-Séntebir" weqesidin kéyin nyu-york shehiride yüz bergen ikkinchi qétimliq eng chong térrorluq hujum bolup hésablinidiken.

"Nyu-york waqti géziti" ning bildürüshiche, özbékistanliq seyfulla se'ipof élip barghan bu qétimqi térrorluq hujumidin qattiq nepretlen'gen özbékistan prézidénti shawket mirzayéf charshenbe küni amérika prézidénti trampgha mektup yollap, özining ölgüchiler a'ilisige alahide teziye bildüridighanliqini, we amérika hökümiti bilen bu mesile üstide hemkarlishidighanliqini bildürgen.

Prézidént shawket mirzayéf mektupida yene seyfulla se'ipofning élip barghan térrorluq hujumini eyiblep, "Bundaq qebih we shiddet bilen élip bérilghan zorawanliq heriketni hergizmu kechürgili bolmaydu," dégen.

Seyfulla se'ipof amérikagha qanunluq yerliship térrorluq hujumi élip barghan ottura asiyadin kelgen tunji kishi emes. Qirghizistandin amérikigha qanunluq kélip yerleshken milliti chéchen ikki aka-uka joxar we tamérlan sarnayéf 2013-yili aprélda boston shehiride élip bérilghan marafonche musabiqige qarshi térrorluq hujumi élip bérip, 3 ademning ölüshi we 260 tin artuq ademning yaridar bolushigha sewebchi bolghan idi. Ilgiri amérika hökümiti bu ikki aka-ukigha chéchenlerning rusiye hökümiti qolida uchrighan ziyankeshlikni nezerde tutup siyasiy panahliq we wetendashliq bergen.

Özbék yash seyfulla se'ipof bolsa amérikaning yéshil karta latariyesini utqandin kéyin amérikagha yerleshken iken.

Siyasiy közetküchilerning bildürüshiche, seyfulla se'ipof, joxar we inisi tamérlan sarnayéflerning amérikagha kélip bundaq térrorluq hujumlarni élip bérishi, xuddi ash bergen'ge musht bergendek bir ish iken. Chünki amérika hökümiti bularni japaliq hayat we zulumdin qutquzup, bulargha panahliq, hetta wetendashliq bersimu, amérikigha minnetdarliq bildurishning ornigha eksiche térrorluq hujumi bilen jawab bergen.

Közetküchilerning bildürüshiche, ikki aka-uka chéchenlik 2013-yili boston shehiride térrorluq hujumi élip bérip bigunah helqni öltürgenliki üchün amérika hökümiti we xelqining rusiyening zulimigha uchrap kéliwatqan chéchenlerge bolghan héssidashliqi yoqalghan.

Bu yil yéngi yil axshimi istanbulning reyna kulubida térrorluq hujumi yüz bérip, 39 adem ölgen we 69 adem yaridar bolghan idi. Bu hujumni qozghighan kishi özbék bolsimu, emma bu hujum Uyghurgha artilip qalghanliqi üchün Uyghurlarning türkiyediki ijabiy obrazigha selbiy tesir peyda qilip, Uyghurlargha bolghan hésdashliq barghanséri azaymaqta.

Toluq bet