Уйғур район даирилири қош тил йәсли башлиқлирини “партийә рази болидиған қош тил йәсли қуруш” бойичә тәрбийилигән

Мухбиримиз ирадә
2017-08-17
Share

Хитай һөкүмитиниң уйғур елида, болупму уйғур елиниң җәнубидики 3 вилайәт, бир областта йеза “қош тиллиқ йәсли қурулуши” ни омумлаштуруп болуш үчүн нурғун маддий күч вә адәм күчи толуқлаш билән бир вақитта йәнә, қош тил йәсли оқутқучилирини сиясий идийә җәһәттин тәрбийиләшкиму охшаш күч сәрп қиливатқанлиқи мәлум.

Тәңритағ торида берилгән хәвәрдин қариғанда, уйғур район даирилири шинҗаң педагогика университетида “2017-йиллиқ җәнубий вә шималий шинҗаңдики йәсли башлиқлириниң қош йөнилишлик вәзипә билән тәрбийилиниш курси” намлиқ бир курс ачқан. Хәвәрдин қариғанда, бу курста җәнубий вә шималий районлардики вәзипә билән чениқидиған 1020 нәпәр йәсли башлиқлири 8-айниң 8-күнидин 16-күнигичә “қош тил” маарипи сияситини чүшәндүрүш, йәсли башлиқлири кәсип өлчими қатарлиқ мәзмунлар бойичә тәрбийиләнгән. Әмма униңда бу “вәзипә билән чениқидиған йәсли башлиқлири” ниң кимләр икәнлики, уларниң немә вәзипә бойичә чениқиватқан кишиләр икәнликигә ениқ изаһат берилмигән.

Хәвәрдин қариғанда, курс ахирлашқан күни уйғур районлуқ парткомниң муавин секретари ли пеңшин мурасимға қатнишип, курсантлардин уйғур елидики йәслиләрни партийә рази болидиған йәсли қилип қуруп чиқишни, дөләт тили атиливатқан хитай тили оқутушини, ишчи-хизмәтчиләрниң идийә-сиясәт, истил қурулушини чиң тутуш арқилиқ мәңгүлүк муқимлиққа еришиштин ибарәт баш нишанға йетишни капаләткә игә қилишни тәләп қилған вә шундақла аптоном районниң “селишқа тегишлик йәслиләрни селиш”, “киришкә тегишлик балиларни киргүзүш”тин ибарәт тарихий характерлик нишани йеқинда реаллиққа айлиниду, дәп сөз қилған.

Хитай һөкүмитиниң бу йилдин етибарән уйғур елиниң җәнубидики йезиларда көпләп йеңи қош тил йәслилирини селиш вә оқутқучи сәпләп, қош тил йәслилирини тез сүрәт билән омумлаштуруш үчүн ғайәт зор мәбләғ вә күч сәрп қилиши чәтәлләрдики уйғур көзәткүчиләрдә гуман қозғиған иди. Улар хитай һөкүмитиниң уйғурларни ассимилятсийә қилиш арқилиқ муқимлиқ яритиштин ибарәт нишанни ишқа ашуруш үчүн пүтүн күчини уйғур йәсли балилириға қаритиватқанлиқини билдүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт