Майк помпейо билән яң җйечи һавайдики учришип, уйғур, хоңкоң, тәйвән қатарлиқ мәсилиләрни сөзләшкән

Мухбиримиз әркин
2020-06-18
Елхәт
Пикир
Share
Принт

Америка ташқи ишлар министири майк помпейо билән хитайниң ташқи ишларға мәсул сиясий бюро әзаси яң җйечи 17-июн күни американиң тинч окяндики һавай штатида учрашқан.

Мәлум болушичә, икки тәрәп сөһбити уйғур, хоңкоң, тәйвән қатарлиқ мәсилиләргә четилған. Йиғинда тәрәпләр юқириқи мәсилиләрдики мәйданини тәкитләп, һалқилиқ мәсилиләрдә ортақ пикир һасил қилалмиған. Бу икки тәрәп ташқи ишлар мәсуллириниң өткән йили 8-айдин бери тунҗи қетим учришишидур.

Америка ташқи ишлар министирлиқиниң билдүрүшичә, сөһбәт һавай вақти әтигән саәт 9:00 да башлинип, чүштин кейин саәт 3:50 гичә давам қилған. Сөһбәттә помпейо икки тәрәпниң «сода, бихәтәрлик, дипломатийә җәһәтләрдә өз-ара мәнпәәт йәткүзүдиған келишим һасил қилиши», хитайниң буниңдин кейин йүз беридиған корона вируси юқумлирида очуқ-ашкара болуши керәкликини тәкитлигән. Хитай ташқи ишлар министирлиқиниң билдүрүшичә, яң җйечи хитайниң «америка-хитай мунасивәтлиридики позитсийәси шундақла тәйвән, хоңкоң, шинҗаң қатарлиқ назук мәсилиләрдики мәйдани» ни ипадилигән.

У «шинҗаң мәсилиси» дә хитайниң сияситини ақлап, изчил тәкитләп келиватқан сөзлирини тәкрарлиған. яң җйечи «хитай һөкүмитиниң шинҗаңда қанун бойичә террорлуқ вә әсәбийликкә қарши туруш тәдбирлирини қоллинип, шинҗаңниң бихәтәрлик вәзийитидә зор бурулуш ясиғанлиқи», «американиң ‹уйғур кишилик һоқуқ сиясити қанун лаһийәси' ни имзалишиға қаттиқ нарази» икәнликини тәкитлигән. Лекин яң җйечи помпейо билән сөһбәт өткүзүватқан мәзгилдә президент трамп қанун лаһийәсигә имза қойған иди.

Пикирләр (0)
Share
Толуқ бәт