Қирғизистан хитай әлчиханиси һуҗумчисини «таҗикистан пуқралиқидики уйғур» деди

Мухбиримиз меһрибан
2016-09-06
Елхәт
Пикир
Share
Принт

Ройтерс агентлиқиниң хәвәр қилишичә, қирғизистан дөләт бихәтәрлик идариси сәйшәнбә күни бәргән хәвиридә, 30-авғуст қирғизистанниң пайтәхти бишкәктә йүз бәргән, хитай әлчиханисиға қаритилған аптомобиллиқ партлитиш һуҗумини садир қилғучиниң таҗикистан пуқраси, 33 яшлиқ уйғур заһир хелилоф икәнликини, униң нөвәттә сүрийәдә паалийәт елип бериватқан шәрқий түркистан ислам партийисиниң әзаси икәнликини билдүргән.

Ройтерсниң хәвиридә дейилишичә, хадими баянида, 30-авғуст йүз бәргән аптомобиллиқ бомба һуҗумида партлап өлгән заһир хелилофниң сүрийәдә паалийәт елип бериватқан шәрқий түркистан ислам партийисиниң әзаси икәнликини тилға алған.

Америка авазиниң билдүрүшичә, вәқәдин кейин қирғизистан даирилири 5 нәпәр гумандарни қолға алған һәмдә түркийәдики 4 нәпәр гумандарни тутуш буйруқи чиқарған.

30-Авғуст йүз бәргән бишкәктики хитай әлчиханисиға қаритилған аптомобиллиқ һуҗумда, аптомобил шопури өлүп 2 нәпәр әлчихана хадими вә қирғизистан пуқралиқидики бир аял яриланған. Вәқәдин кейин, хитай һөкүмити мәзкур һуҗумни террорлуқ һуҗуми дәп әйиблигән, дәсләпки күнләрдә қирғизистан һөкүмити мәзкур вәқәни тәкшүридиғанлиқини билдүрүп, һуҗумчиниң кимликини ениқлап чиқидиғанлиқини елан қилған иди.
Қирғизистан дөләт бихәтәрлик идарисиниң бу хәвири һәққидә, мустәқил учур мәнбәлириниң испатлишиға еришәлмидуқ.

Пикирләр (0)
Share
Толуқ бәт