Хитай билән қирғизистан истратегийәлик һәмкарлиқ мунасивитини күчәйтиш һәққидә қошма баянат елан қилди

Мухбиримиз әзиз
2019-06-13
Елхәт
Пикир
Share
Принт

Қирғизистанда зиярәттә болған хитай президенти ши җинпиң 13-июн күни қирғизистан президенти сорунбай җенбеков билән қошма баянат елан қилип, икки тәрәпниң һәрқайси җәһәтләрдики истратегийилик һәмкарлиқини техиму юқири пәллигә елип чиқидиғанлиқини билдүрди.

«Тәңритағ» ториниң 13-июндики хәвиридә ейтилишичә, бу қетимлиқ қошма баянатта икки тәрәп өзара һөрмәт қилиш, өзара мәнпәәт йәткүзүш асасида сиясий, сода, бихәтәрлик қатарлиқ көплигән җәһәтләрдики һәмкарлиқни техиму чоңқурлаштуридиғанлиқини билдүргән. Шуниңдәк сиясий җәһәттики ишәнчниң омумий истратегийилик мунасивәтләрниң асаси икәнликини алаһидә тәкитлигән.

Қошма баянаттики муһим нуқтиларниң бири икки тәрәп игилик һоқуқи, земин пүтүнлүки, бихәтәрлики қатарлиқ ядролуқ мәсилиләрдә бир-бирини қоллайдиғанлиқини, үчинчи бир тәрәпниң бу амилларға зиян йәткүзүшигә йол қоймайдиғанлиқини билдүргән. Шундақла барлиқ шәкилдики террорлуққа, әсәбийликкә вә «үч хил күчләр» гә қарши туридиғанлиқини, буларниң икки тәрәп үчүн ортақ тәһдит икәнлики алға сүрүлгән. Қирғизистан тәрәп бу җәһәттә алаһидә қилип «биз хитай хәлқ җумһурийитиниң шинҗаңда әминлик вә тәрәққият бәрпа қилиш үчүн иҗра қиливатқан түрлүк сиясәтлирини қәтий һимайә қилимиз,» дегән.

Һалбуки, уйғур дияридики сиясий бастуруш вә зор тутқун һәрикитидә бир қисим қирғиз зиялийлириниң вә қирғиз аммисиниң лагерларға қамалғанлиқи һәққидә мәлуматлар оттуриға чиққан. Мушундақ әһвалда қирғизистанниң бу мәсилиләрни тилға елишниң орниға хитай билән бирликтә бу хилдики қошма баянатни елан қилиши бир қисим йәрлик кишиләрни толиму үмидсизләндүргән. Анализчилар болса бу һәқтә пикир қилип «қирғизистанниң бу һәрикәтлири хитайниң иқтисадий ярдими үчүн қилиниватқан хушамәттин башқа нәрсә әмәс. Қирғизистандәк аҗиз вә кичик бир дөләтниң буниңдин башқиға күчи йәтмәйду,» деди.

Мәлум болушичә, хитай билән қирғизистан оттурисидики истратегийәлик һәмкарлиққа мунасивәтлик бир қатар келишимләр 2002-йилидин буян көп қетим имзаланған. Бу қетимқи қошма баянаттин кейин қирғизистан һөкүмити ши җинпиңға 1-дәриҗилик «манас ордени» тәқдим қилған. Мәзкур орден болса қирғизистанниң әң алий дәриҗилик ордине болуп, адәттә үч дәриҗигә айрилған икән.

Пикирләр (0)
Share
Толуқ бәт