Хитай тәнһәрикәтчилири бейҗиң қишлиқ олимпикида уйғур “қул әмгики” мәһсулатлирини ишлитидикән
Бейҗиң қишлиқ олимпик мусабиқисидә хитай тәнһәрикәтчилириниң уйғур елидә ишләпчиқирилған “қуллар әмгики” мәһсулатлирини ишлитидиғанлиқи илгири сүрүлди.
Хоңкоңда чиқидиған “җәнубий хитай сәһәр почтиси” гезитиниң хәвәр қилишичә, уйғур елиниң алтай вилайитигә қарашлиқ қаба наһийәсидики бир хитай завути йеқинда пәләй, қулақ асриғуч, тейилиш кийимлирини өз ичигә алған 2000 йүрүш мәһсулатни хитай тәнһәрикәтчилириниң мусабиқидә ишлитиши үчүн бейҗиңға йәткүзүп бәргән.
Бу хәвәрниң кишилик һоқуқ тәшкилатлири вә бәзи ғәрб парламент әзалири олимпик комитетиға хәт йезип, бейҗиң қишлиқ олимпикида уйғур мәҗбурий әмгәк мәһсулатлириниң ишлитилмәсликигә капаләтлик қилишни тәләп қиливатқан бир вақитта ашкарилиниши диққәт қозғиди. Ройтерс агентлиқиниң хәвәр қилишичә, америка дөләт мәҗлисиниң хитай ишлири комитети 12-январ хәлқара олимпик комитетиға хәт йезип, бейҗиң қишлиқ олимпикида мәҗбурий әмгәк мәһсулатлириниң ишлитилишидин әндишә қилидиғанлиқини ейтқан.
Америка президенти байден өткән айда “уйғур мәҗбурий әмгикиниң алдини елиш қануни” ға имза қоюп, уйғур елидә ишләпчиқирилған мәҗбурий әмгәк билән мунасивәтлик мәһсулатларниң америкаға киришни чәклигәниди. “җәнубий хитай сәһәр почтиси” ниң билдүрүшичә, юқири дәриҗилик бир хитай әмәлдари хитай тәнһәрикәтчилирини шинҗаңдин кәлгән буюмлар билән тәминләшниң “райондики хам материялларниң сүпити” ни намаян қилидиғанлиқини билдүргән. У йәнә бу формилар “шинҗаңниң 2022-йиллиқ бейҗиң қишлиқ олимпикигә қошқан төһпә” икәнликини ейтқан.
- Әлфидар илтәбир америка уйғур бирләшмисиниң йеңи нөвәтлик рәисликигә сайланди
- Қәшқәрдә лагерға адәм тутушта хизмәт көрсәткән сақчиниң қизиму 10 йиллиқ кесилгән
- Ғулҗада түрмидин чиққан яқуп һәсән һарпа күни, оғли билал яқуп һейт күни түгәп кәткән
- Хитай бачелетниң зиярити һарписида чәт әлдики уйғурларға түрмидики аилә әзалириниң давасини қилмаслиқ тоғрисида бесим ишләткән
- Б д т кишилик һоқуқ алий комиссари бачелетниң хитай зиярити рәсмий башланди
