Рабийә қадир ханим G20 йиғиниға қатнашқан дөләт рәһбәрлирини хитайға қаттиқ бесим ишлитишкә чақирған

Мухбиримиз сада
2019-06-28
Елхәт
Пикир
Share
Принт

28-Июн японийәниң осака шәһиридә G20 йиғини ечилди. Дәл мушу вақитта дуня уйғур қурултийиниң сабиқ алий рәһбири рабийә қадир ханим осакаға йетип берип, һәрқайси дөләт рәһбәрлирини хитайниң уйғур диярида елип бериватқан қирғинчилиқини тохтитиш һәққидә ши җинпиңға бесим ишлитишкә чақирған.

«Һиндистан вақти» гезитиниң 28-июндики хәвиригә қариғанда, G20  йиғини мәзгилидә рабийә қадир ханим мухбирларға сөз қилип, «пүткүл уйғур миллити еғир тәһдиткә дуч келиватиду, бу бир реал вә җиддий вәзийәттур,» дегән шундақла әгәр хитайниң сода саһәсидики шериклири бу вәзийәткә қарита җиддий тәдбир алмиса, уйғур мәдәнийитиниң вәйран болуп кетидиғанлиқини билдүргән.

Рабийә қадир ханим сөзидә йәнә «мән явропадики хитайға иқтисадий җәһәттин беқинип қалған дөләтләрниң уйқусини ечишини, хитайниң уйғур дияридики қирғинчилиқлирини тосушни вә бу җәһәттә әмәлий һәрикәт қоллинишини үмид қилимән,» дегән.

G20 Йиғини ечилиштин бир һәптә илгири японийә хитайниң қаттиқ қарши турушиға қаримай рабийә қадир ханимға виза берип, униң мәзкур йиғин җәрянида японийәдә сиясий паалийәтләргә қатнишишиға йол қойған иди. «Һиндистан вақти» гезитиниң мәзкур хәвиридә хитай һөкүмити үчүн «тәһдит» дәп қариливатқан шундақла «бөлгүнчилик» билән әйиблиниватқан рабийә қадир ханимниң ши җинпиңниң алдида пәйда болуши уни қаттиқ ғәзәпләндүргән болуши мумкинлики тилға елинған.

Пикирләр (0)
Share
Толуқ бәт