Хотәндә рамизан һарписида 22 уйғурниң тутқун қилинғанлиқи илгири сүрүлди

Мухбиримиз әркин
2017-05-26
Елхәт
Пикир
Share
Принт

Хотәндә рамизан һарписида 22 нәпәр уйғурниң муқимлиқ сәвәблик тутқун қилинғанлиқи илгири сүрүлди. Д у қ ниң билдүрүшичә, бу 22 уйғур йеқинқи бир һәптә ичидә хотән шәһири, қариқаш наһийәси вә хотән-қәшқәр ташйолиниң хотәндин чиқиш еғизлиридики тәкшүрүш понкитлирида тутқун қилинған.

Бирақ д у қ учурида, тутқунларниң исми, җинси, йеши вә салаһийитигә даир башқа тәпсилатлар тилға елинмиған. Д у қ баянатчиси дилшат ришитниң җүмә күни радийомизға билдүрүшичә, тутқунлардин 7 киши хотән айродромида тарқақ һәҗгә маңған дегән гуман билән тутуп қелинған. Икки киши қариқаш наһийәсидә рамизанни тәшвиқ қилған дәп тутқун қилинған. Қалған кишиләр хотән-қәшқәр таш йолидики тәкшүрүш понкитида ахтурулуп, йенидин диний китаблар чиқип қалғанлиқи үчүн «қанунсиз диний материял сақлиған» дәп тутқун қилинған. Мухбиримиз  хотән йәрлик сақчи органлириға телефон қилип, мәзкур хәвәрни дәлилләшкә тиришқан болсиму, бирақ буниңға муваппәқ болалмиди.

Хитай һөкүмити һәр йили рамизан һарписида җайларға һөҗҗәт чүрүшүп, мәсчит вә шәхсләрниң диний паалийитини контрол қилишни күчәйтип кәлгән, ресторанларниң тиҗарити, кимләр роза тутса болиду, кимләр тутса болмайдиғанлиқиғиму арилишип, хилаплиқ қилғучиларни қаттиқ җазалап кәлгән иди. Дилшат ришитниң билдүрүшичә, хотән айродромида тутқун қилинған 7 кишиниң һәммисиниң йеши 60 тин һалқиған кишиләркән.

Дилшат ришит, хитайниң һәрйили рамизанда уйғурларни қаттиқ қамал қилип, униң диний әркинликигә техиму қаттиқ бузғунчилиқ қилишни бир адәткә айландурувалғанлиқини билдүргән болсиму, бирақ хитай һөкүмити бу хил тәнқидләрни изчил рәт қилип, өзиниң «диний радикаллиқ» қа қарши туруватқанлиқини илгири сүрүп кәлди.

Пикирләр (0)
Share
Толуқ бәт