Уйғур елидә “сақал қоймай, яғлиқ чигмәй” мәдәнийәтлик шәһәр аһалиси болуш тәшвиқ қилинмақта

Хитай һөкүмәт даирилири нөвәттә уйғурлар көп олтурақлашқан вилайәт, шәһәрләрдә омумйүзлүк һалда аталмиш мәдәнийәтлик шәһәр қуруш паалийитини кәң қанат яйдурушқа башлиған.

Уйғурларниң миллий әнәнилирини чәкләш характерини алған мәдәнийәтлик шәһәр қуруш һәрикитиниң асасий мәзмуни-вәтәнни сөйүш, милләтләр иттипақлиқини сөйүш, муқимлиқни сөйүш, қанунсиз диний паалийәтләргә қарши туруш, яш әрләрниң сақал қоюшиға қарши туруш, яш қизларниң чүмбәл артиши, һиҗап кийишигә қарши туруштин ибарәт.

Шинҗаң мәдәнийәт торида берилгән хәвәрдә ейтилишичә, бу һәрикәт нөвәттә қәшқәр шәһири миқясида кәң қанат яйдурулуп, мәктәпләрдин идарә-орган, наһийә, йеза һәммә йәргичә тәшвиқ қилинған.

Хитай даирилири уйғур елидә аталмиш диний радикаллиққа зәрбә бериш нами астида уйғурларниң миллий өрп-адәтлири йосунида кийингән аяллар, сақал қойған кишиләрни зәрбә нишани қилди. Һазир чүмбәл артқан, сақал қойғанларни мәктәпкә, аптобусқа, кутупханиға киргүзмәслик һәққидә чиқирилған уқтурушларни һәммә йәрдә учратқили болиду.

Бүгүн йәнә, уйғур биз ториниң хәвәр қилишичә, һазир уйғур елиниң қәшқәр, хотән, ақсу қатарлиқ җайларда алий мәктәп пүттүрүп қайтип кәлгән нурғун қизлар бешидики яғлиқи сәвәбидин хизмәткә орунлишалмиған. Қәшқәрдики биз қиз өзиниң мәмурлуқ имтиһанида юқири нәтиҗә алған болсиму, әмма бешидики яғлиқи сәвәбидин йүз туранә имтиһанға елинмиғанлиқини инкас қилған.