Uyghur élide “Saqal qoymay, yaghliq chigmey” medeniyetlik sheher ahalisi bolush teshwiq qilinmaqta

Xitay hökümet da'iriliri nöwette Uyghurlar köp olturaqlashqan wilayet, sheherlerde omumyüzlük halda atalmish medeniyetlik sheher qurush pa'aliyitini keng qanat yaydurushqa bashlighan.

Uyghurlarning milliy en'enilirini cheklesh xaraktérini alghan medeniyetlik sheher qurush herikitining asasiy mezmuni-wetenni söyüsh, milletler ittipaqliqini söyüsh, muqimliqni söyüsh, qanunsiz diniy pa'aliyetlerge qarshi turush, yash erlerning saqal qoyushigha qarshi turush, yash qizlarning chümbel artishi, hijap kiyishige qarshi turushtin ibaret.

Shinjang medeniyet torida bérilgen xewerde éytilishiche, bu heriket nöwette qeshqer shehiri miqyasida keng qanat yaydurulup, mekteplerdin idare-organ, nahiye, yéza hemme yergiche teshwiq qilin'ghan.

Xitay da'iriliri Uyghur élide atalmish diniy radikalliqqa zerbe bérish nami astida Uyghurlarning milliy örp-adetliri yosunida kiyin'gen ayallar, saqal qoyghan kishilerni zerbe nishani qildi. Hazir chümbel artqan, saqal qoyghanlarni mektepke, aptobusqa, kutupxanigha kirgüzmeslik heqqide chiqirilghan uqturushlarni hemme yerde uchratqili bolidu.

Bügün yene, Uyghur biz torining xewer qilishiche, hazir Uyghur élining qeshqer, xoten, aqsu qatarliq jaylarda aliy mektep püttürüp qaytip kelgen nurghun qizlar béshidiki yaghliqi sewebidin xizmetke orunlishalmighan. Qeshqerdiki biz qiz özining memurluq imtihanida yuqiri netije alghan bolsimu, emma béshidiki yaghliqi sewebidin yüz turane imtihan'gha élinmighanliqini inkas qilghan.