Сайрагүлниң хитайға қайтурулмаслиқи уйғур дияридики йәнә бир қисим әһвалларни ашкарилиди

Мухбиримиз әзиз
2018-08-03
Share

Қазақистанға қечип чиққан сайрагүл савутбай илгири уйғур дияриниң моңғулкүрә наһийисидики «тәрбийиләш мәркизи» дәп атиливатқан йиғивелиш лагерида хитай тилидин дәрс өткән. У қазақистанға чиққандин кейин өзи лагерда көргән қабаһәтлик әһвалларни ташқи дуняға ашкарилиғанлиқи үчүн 1-авғуст күни қазақистан соти уни хитайға қайтурмаслиққа һөкүм қилған иди.

Униң «йәр шари вә почта» гезитиниң мухбириға ейтип беришичә, бу лагердики кишиләр арисида бирму хитай мәһбус йоқ икән. Мәһбусларға мәҗбурий йосунда хитайчә өгитилидиған болуп, буни қаттиқ вәзипә қатарида иҗра қилиш шәрт икән, буни рәт қилишқа һечкимниң һәдди әмәс икән. Улар һәр күни «компартийә болмиса йеңи җуңго болмайтти» дегән инқилабий нахшини ейтиши лазим икән. Лагердикиләр бирәр еғиз хата гәп қилип салмаслиқ үчүн әтигәнлики ойғанғандин тартип ғизаланған яки таһарәт сундурған вақитлардиму еғизлирини чиң юмувалидикән. Шуңа бу җайда һәрқачан тимтаслиқ һөкүм сүридикән. Лагердикиләрниң тамиқи «шифән», көктат шорписи вә нан болуп, уларға гөш берилмәйдикән. Әмма ашу тамақларму тойғудәк берилмәйдикән.

«Йәр шари вә почта» гезитиниң 2-авғусттики хәвиридә ейтилишичә, сайрагүл қоюп берилип әтиси мәзкур гезитниң мухбириниң зияритини қобул қилған. Әмма шу күнниң өзидила униң уйғурлар дияридики сиңлиси вә икки дости тутқун қилинған. Сайрагүл бу һәқтә сөз қилип: «1-авғуст күни кәч саәт 6 дә сот мени азад қилди. Әмма бу хушаллиқим бир соткиму давам қилмиди. Йеқин кишилирим бир күн өтүпла мана мушу йосунда көздин йүтти. Шүбһисизки, бу хитай һөкүмитиниң өч елиш һәрикити» дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.