Shangxey hemkarliq teshkilati ramkisi astida térrorluqqa a'it uchur toplash kücheytilidiken

Rusiyening “Sodiger” gézitining xewer qilishiche, shangxey hemkarliq teshkilatining térrorluqqa qarshi rayonluq kéngishi yighin chaqirip, mezkur kéngesh qarmiqida özini qoshup öltürgüchi-térrorchilargha a'it uchur ambiri qurushni qarar qilghan.

Yighindin kéyin, rusiye fédératsiye bixeterlik idarisining birinchi mu'awin mudiri sérgéy smirnof muxbirlargha bu heqte melumat bérip, “Rusiye mundaq teshebbusni otturigha qoydi. Hazir biz buni qarar qilduq” dégen. U sözide hazir shangxey hemkarliq teshkilatining térrorluqqa qarshi rayonluq kéngishi ramkisi astida térrorgha qarshi uchurlarning topliniwatqanliqi, hazirghiche ularning uchur ambirida ikki yérim ming kishi we 69 teshkilatning uchuri barliqi, belki bu menbeni özini qoshup öltürgüchi-térrorchiliq roli guman qiliniwatqan shexslerning uchuri bilen toluqlishi mumkinlikini ilgiri sürgen.

Rusiye fédératsiye bixeterlik idarisining mu'awin bashliqi sérgéy smirnof yene, shangxey hemkarliq teshkilati alahide xizmet da'iriliri, bishkektiki xitay elchixanisi yénida yüz bergen térrorluq hujumida tajik, xitay we rusiye izliri barliqini békitkenlikini ilgiri sürgen.

Qirghizistan dölet bixeterlik da'iriliri 30-awghust küni yüz bergen bishkektiki xitay elchixanisi yénidiki aptomobil bilen özini qoshup partlitish hujumini sadir qilghuchining kimlikini békitkenlikini we bashqa munasiwetlik shexslerni élan qilghan idi.