Xitayning sherqiy déngizda uzun menzillik urush ayropilanlirini uchurushi yaponiyening inkasini qozghidi

Muxbirimiz erkin
2017-08-25
Élxet
Pikir
Share
Print

Xitayning uzun menzillik bombardimanchi ayropilanliri peyshenbe küni yaponiye zéminining yénidin uchup ötkendin kéyin, buninggha yaponiye dölet mudapi'e ministiri inkas qayturup, béyjingning herikitige diqqet qiliwatqanliqini bildürgen.

Roytérs agéntliqining xewer qilishiche, yaponiye dölet mudapi'e ministiri itsunori onodéra jüme küni ötküzgen axbarat yighinida: "Bu, xitay herbiy ayropilanining bizning xatirimizde tunji qétim bu yoldin uchup ötüshidur. Biz buninggha diqqet qiliwatqanliqimizni diplomatik qanallar arqiliq (xitaygha) yetküzduq" dégen. Xitayning 6 bombardimanchi ayropilani peyshenbe küni sherqiy déngizni boylap yaponye zéminining yénidin uchup ötken.

Analizchilarning ilgiri sürüshiche, xitay urush ayropilanliri yaponiye hawa boshluqigha kirmigen bolsimu, biraq uning sherq déngiz weziyiti jiddiyliship ketken bundaq shara'itta yaponiye zéminigha yéqinlishishi yaponiyeni bi'aram qilghan.

Xitay urush ayropilanlirining yéqindin buyan teywen we yaponiye kontrolluqidiki arallarning etrapida uchush manéwiri élip bérishi yaponiyedin bashqa teywenning diqqitini qozghighan. U, xitay hawa armiyesi bu ayning bashlirida ötküzgen 3 künlük manéwirida armiyesini jiddiy haletke ötküzgen idi. Biraq, xitay hökümiti jüme küni yaponiyening pikrini ret qilip, buning bir "Normal" manéwir ikenlikini we héchkim xitay ayropilanlirining manéwirini tosup qalalmaydighanliqini bildürgen.

Roytérsning xewer qilishiche, xitay dölet mudapi'e ministirliqi jüme külni hawa armiye bayanatchisining sözini neqil keltürüp, "Qandaq qarshiliqqa uchrisun, xitay hawa armiyesi uchushini burunqidek dawamlashturidu" dégen.

Toluq bet