Ши җинпиң партийә әзалирини «түрлүк хейим-хәтәргә қарши күрәш роһини йетилдүрүш» кә чақирди

Мухбиримиз әзиз
2019-09-04
Елхәт
Пикир
Share
Принт

Хитай рәиси ши җинпиң йеқинда хитай компартийәсини «түрлүк тәһдитләр вә хейим-хәтәрләргә толған узақ мәзгиллик күрәш» кә чақириш билән биргә барлиқ партийә әзалиридин «күрәш роһини урғутуп, бихәтәрлик киризиси вә малийә киризисиға тақабил туруш» ни тәләп қилған.

«Блумберг почтиси» гезитиниң 3-авғуст күни шинхуа агентлиқи тарқатқан хәвәрдин нәқил елип баян қилишичә, ши җинпиң бейҗиңдики кадирларни тәрбийәләш курсида «биз дуч келидиған бу күрәш узун мәзгиллик күрәштур» дәп көрсәткән.

У сөзидә пат йеқинда көрүлидиған бу қийинчилиқларниң 2049-йилиға барғичиму давам қилиши мумкинликини билдүргән. Хитай һөкүмитиниң зувани болған «хәлқ гезити» ниң 4-авғусттики санида ши җинпиңниң сөзи алаһидә йәр алған һәмдә «бир қисим бели бош яш кадирларниң җапа-мушәққәткә қарши күрәш қилиш роһи кәмчил болмақта. Бу һал давам қиливәрсә партийәмиз үчүн зор апәткә айлиниду» дегән қурлар қошумчә қилинған.

Хәвәрдә ейтилишичә, америка-хитай оттурисидики сода уруши һәмдә хитай компартийәси дуч келиватқан түрлүк «сиясий муқимлиқ мәсилилири», җүмлидин иқтисадий тәрәққиятниң тохтап қелиши, дөләт мудапийәси мәсилиси, хоңкоң вә тәйвән мәсилиси қатарлиқлар нөвәттә хитай компартийәсиниң қаттиқ бешини ағритмақта икән.

Мәлум болушичә, нөвәттә хитайдики рәсмий мәтбуатларда ши җинпиң «хәлқ даһийси» дегән атақ билән тәсвирләнмәктә икән. Бу атақ болса әйни вақитта хитай рәиси мав зедоңғила хас һөрмәт нами сүпитидә ишлитилгән икән.

Пикирләр (0)
Share
Толуқ бәт