Даириләр уйғур аптоном райониниң сиясий-идийә хизмити саһәси бойичә кәспий унван берилгән хадимларниң тизимини елан қилған

Мухбиримиз қутлан
2017.01.02

Игилинишичә, уйғур аптоном районлуқ партком тәшвиқат бөлүми пүтүн райондики һәр дәриҗилик партком вә һакимийәт органлирида сиясий-идийә хизмити билән шуғуллинидиған хадимларға кәспий унван баһалиши елип барған.

Тәңритағ ториниң бу һәқтики хәвиригә қариғанда, уйғур аптоном районлуқ партком тәшвиқат бөлүми 27-декабир күни омумий уқтуруш чиқирип, 2016-йили сиясий-идийә хизмити саһәси бойичә кәспий унван берилгән хадимларниң тизимини елан қилған.

Тизимликтин мәлум болушичә, 33 кишигә алий сиясий тәтқиқатчи, 48 кишигә оттура дәриҗилик сиясий тәтқиқатчи, 33 кишигә ярдәмчи тәтқиқатчи унвани берилгән.

Сиясий-идийә хизмити саһәсидә кәспий унван берилгән йүз нәччә киши ичидә пәқәт 3 нәпирила уйғур болуп, қалғанлириниң һәммиси һәр дәриҗилик парткомларда тәшвиқат хизмити билән шуғуллинидиған хитай хадимлар икән.

Хитайда алий мәктәпләр, тәтқиқат орунлири вә башқа кәспий саһәдикиләр үчүн кәспий унван системиси йолға қоюлған болуп, мәмурий саһәдикиләр үчүн айрим дәриҗә системиси турғузулған.

Һалбуки, уйғур аптоном районлуқ партком тәшвиқат бөлүминиң бу қетим районда сиясий-идийә тәшвиқати билән шуғуллинидиған хадимларға кәспий унван бериши көзәткүчиләрниң диққитини қозғимақта. Улар бирдәк, даириләр бу хил усул арқилиқ компартийәниң сиясий тәшвиқати билән шуғуллинидиған сиясий мәддаһларни илһамландурушни мәқсәт қилған, дәп қаримақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.