Тайландтики бомба вәқәсигә четишлиқ икки уйғур йәнә сотланди


2016-04-20
Share

Ройтерс агентлиқиниң хәвиригә қариғанда, 20 - апрел күни баңкок ераван ибадәтханиси бомба партлаш вәқәсигә алақидар икки уйғур һәрбий сотта сотланған.

Өткән йили 17 - авғуст күни йүз бәргән мәзкур вәқәдә бәш киши өлүп, 120 дин артуқ киши яриланған. Әйни вақитта анализчилар вә тайланд даирилири бу қетимқи бомба партлаш вәқәсини "100 нәччә уйғурни тайланд һөкүмитиниң хитайға қайтуруп бәргәнликигә қарита уйғурларниң өч елиш һәрикити болуши мумкин" дәп гуман қилған иди.

Бу қетим сотқа чиққан мирәли йүсүп вә адәм қарадағ исимлик икки уйғур яш өзлиригә артилған барлиқ җинайәтләрни инкар қилған.

Сақчи тәрәпниң ейтишичә, адәм қарадағ өткән йилқи вәқә йүз бериштин сәл бурун мүрисигә сомка есивалған һаләттә шу җайдики орундуқта олтурған болуп, булар бихәтәрлик камерасида хатирилинип қалған.

Чаршәнбә күндики сотни үч сотчи ачқан, әмма заседатиллар қатнашмиған. Тил җәһәттики охшимаслиқ түпәйлидин сот җәрянидики инглизчә - тайландчә- уйғурчә тәрҗимә хизмити наһайити қийинда тамамланған.
Мирәли йүсүп ройтерс агентлиқиға бу сотниң "наһайити узунға созидиғанлиқини" пәрәз қилидиғанлиқини билдүргән.

Сақчи даирилири йәнә баңкок бомба һуҗумиға мунасивәтлик 15 адәм үстидин тутуш буйруқи чиқирилғанлиқи, әмма буларни һазирғичә тапалмиғанлиқини билдүргән.

Мирәли йүсүп вә адәм қарадағ бу йил феврал һәрбий сотта сотқа тартилған. Улар әйни чағдиму өзлиригә артилған барлиқ җинайәтләрни рәт қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт