Tayland bomba weqesidiki Uyghur gumandarlar insaniy mu'amile telep qildi

Muxbirimiz méhriban
2016.05.17
Share on WhatsApp
Share on WhatsApp

Gérmaniye awazi radiyosining roytérs agéntliqidin neqil élip xewer bérishiche, tayland saqchiliri teripidin bultur 17-awghust yüz bergen ériwan ibadetxanisidiki bomba partlash weqesining gumandari dep qolgha élin'ghan ikki Uyghur üstidin, 15-may seyshenbe küni tayland herbiy sotida yene bir nöwetlik sot échilghan.

Sotta özlirining gunahsiz ikenlikini tekitligen ikki neper Uyghur gumandar özlirige insaniy mu'amile qilishni telep qilghan.

Gumandarlardin adam qaradagh sot meydanidin putlirigha kishen sélin'ghan halette saqchilar teripidin yalap chiqiliwatqanda keypiyati nahayiti jiddiyleshken halda, sot meydani sirtida saqlap turghan muxbirlargha “Men haywan emes! men adem, men adem!” dep warqirighan. Yene bir gumandar mir'eli yüsüp, saqchi aptomobiligha yalap chiqiliwatqanda “Biz gunahsiz, bizni qutquzuwélinglar, kishilik hoquq nege ketti?” dep warqirighan.

Bultur 17-awghust bangkok shehiridiki érawan ibadetxanisi aldida yüz bergen bomba weqeside 20 adem ölüp, 125 kishining yarilan'ghanliqi xewer qilin'ghan. Kéyin tayland saqchi terep mezkur weqege munasiwetlik ikki neper Uyghur gumandarni tutqun qilghanliqini we ularning deslepki qedemde jinayitini boynigha alghanliqini bildürgen. Emma bu Uyghurlar ular üstidin échilghan sotta eslidiki iqraridin yéniwélip, özlirining gunahsizliqini éytqan idi. Bu yil 2-ayda metbu'atlarning ziyaritini qobul qilghan adam qaradaghning adwokati skochart kanpay, adam qaradaghning saqchilarning qiynap soraq qilishi netijiside eyni chaghda iqrar qilghan bolsimu, emma kéyin sotta öz iqraridin yéniwalghanliqini bildürgen idi. Xewerlerdin melum bolushiche, bu ikki gumandar üstidin hazirghiche birqanche qétimliq sot échilghan. Nöwette 250 tin artuq kishi sotta guwahliq bérishke chaqirilghini üchün sot bu yil axirighiche dawamlishishi yaki yene bir yil sozulushi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet