Реактип айропилан вә аләм кемисиниң маторини оғрилашқа урунған бир гуруһ хитайлар америкида әйибләнди

Мухбиримиз шөһрәт һошур
2018-10-31
Елхәт
Пикир
Share
Принт

Ройтерс агентлиқиниң бүгүнки хәвиригә қариғанда, хитайниң җяңсу өлкилик дөләт хәвпсизлики назаритигә тәвә болған бир гуруһ хитай хадимлар америка әдлийә тармақлири тәрипидин җасуслуқ билән әйибләнгән.

30-Өктәбир күни ашкариланған бу һәқтики әйибнамидә дейилишичә, хитайниң дөләт хәвпсизлики оргиниға тәвә болған мәзкур хадимлар компютер һуҗумчилири, йәни (хаккерлар) вә алақидар ширкәт хадимлирини ялливелип, америкиниң реактиплиқ айропиланлири билән аләм кемилиригә мунасивәтлик матор системисиниң исхемисини оғрилашқа урунған.

Әйибнамидә чүшәндүрүлүшичә, америкиниң авиатсийә саһәсидики 10 муһим ширкити хаккерларниң һуҗумиға учриған. Тор һуҗумчилири вә ялливелинған ширкәт хадимлири билән алақиси болған җа роң, чәй мең қатарлиқ 10 нәпәр хитай дөләт хәвпсизлики хадимлири мәзкур әйибнамидә җасуслуқ җинайити билән әйибләнгән.

Әйибнамидә хитай тәрәпниң мәзкур айропилан матори исхемисини оғрилаш арқилиқ тәтқиқат елип бармай вә чиқим тартмай туруп өзлиригә хас айропилан матори ясимақчи болғанлиқи әскәртилгән. Хитай ташқи ишлар министирлиқиниң баянатчиси лу каң бүгүн инкас қайтуруп, америка тәрәпниң бу әйибнамисиниң асассизлиқини, мәзкур җасуслуқ делосиниң бир тоқулма һекайә икәнликини әскәрткән.

Америка адаләт министирлиқиниң дөләт хәвпсизликигә мәсул хадими җон демерс бүгүн бу һәқтә пикир баян қилип, буниң бир башлиниш икәнликини, буниңдин кейин америкиниң өзиниң әқлий мүлүклири билән мәбләғлириниң оғрилинишиға қәтий йол қоймайдиғанлиқини тәкитлигән. Мәлум болушичә, бу америкиниң йеқинқи икки ай ичидә хитайға алақидар 3‏-җасуслуқ делосини паш қилиши икән.

Пикирләр (0)
Share
Толуқ бәт