Тәйвән б д т “йемәк-ичмәк вә йеза игилик комитети” ни тәйвәнни кәмситиш билән әйиблигән

Мухбиримиз ирадә
2016.09.22

Тәйвән өзиниң бирләшкән дөләтләр тәшкилатиниң хәлқара белиқчилиқ санаити йиғинидин чәкләнгәнликигә наразилиқ билдүргән.

Бирләшмә агентлиқиниң хәвиридин қариғанда, тәйвәнниң мәркизи агентлиқи хәвәр тарқитип, б д т ға қарашлиқ “йемәк-ичмәк вә йеза игилик комитети” тәрипидин бу нөвәт италийәдә чақирилған йиғинға қатнашмақчи болған икки нәпәр тәйвәнлик вәкилниң йиғинға қатнаштурулмиғанлиқини, буниң билән тәйвән ташқи ишлар министирлиқиниң бу комитетқа наразилиқ хети әвәтип, уларни тәйвәнни кәмситиш билән әйиблигәнликини билдүргән.

Хәвәрдә, тәйвәнниң бу йиғинға қатнишиштин чәклинишиниң кәйнидә хитай һөкүмитиниң қоли бар, дейилгән болсиму бу учурниң қандақ игиләнгәнлики тилға елинмиған.

Мәлум болушичә, тәйвәнлик әзалар б д т ға қарайдиған бу комитетниң йиғинлириға 2003-йилидин етибарән мутәхәссис яки һөкүмәткә қарашлиқ болмиған органларниң әзаси сүпитидә қатнишип кәлгән икән. Бирақ, бу нөвәт улар туюқсизла қатнишиштин чәкләнгән.

Бирләшмә агентлиқиниң хәвәр қилишичә, бу қетимлиқ вәқә хитай һөкүмитиниң тәйвән мәсилиси үстидики дипломатик бесимини чиңитиватқанлиқиниң ипадиси икән. Техи бир қанчә күн аввал мейипләр олимпик тәнһәрикәт йиғиниға қатнашмақчи болған тәйвәнлик тәнһәрикәтчиләрниң формисидики дөләт бәлгиси хитайниң қаршилиқиға учриғанлиқтин өзгәртилишкә мәҗбур болғанлиқи һәққидики хәвәр ашкарилинип, тәйвәнликләрни нарази қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.