Tashkenttiki xitay elchixanisi özbékistandiki Uyghur oqughuchilarni teshkillep “Tughqanlar söhbet yighini” ötküzgen

Muxbirimiz eziz
2021.12.20

Xitay hökümitining Uyghur diyaridiki siyasiy basturush qilmishi her sahening keskin tenqidlishige duch kéliwatqanda, 17-dékabir küni özbékistanda oquwatqan Uyghur oqughuchilarning “Tughqanlar söhbet yighini” her sahening diqqitini qozghidi.

Xitay hökümiti bashqurishidiki shinxu'a agéntliqining xewiride éytilishiche, bu qétimliq widiyoloq söhbette nuqtiliq qilip özbékistanda oquwatqan Uyghur oqughuchilarning aghzidin “Amérika bashchiliqidiki düshmen küchlerning shinjangda irqiy qirghinchiliq boluwatidu, dégen sepsetisige reddiye béreyli” dégen mezmunda nutuqlar sözlen'gen. Shuningdek “Mejburiy emgek”, “Qirghinchiliq” dégen hadisilerning “Uyghur diyarida esla mewjut emesliki, eksiche barliq kishilerning bextiyar turmush kechüriwatqanliqi” alahide tekitlen'gen. Xitayning tashkenttiki bash elchixanisi uyushturghan bu söhbet yighini jeryanida “Wetenning birlikini qoghdash”, “Milletler ittipaqliqini qoghdash”, “Milliy bölgünchilikke qarshi turush” dégendek atalghularning köplep ishlitilishi, bu tor yighinining bir qétimliq tipik siyasiy teshwiqat pa'aliyiti ikenlikidin bisharet bergen.

Melum bolushiche, xitay hökümiti yéqinqi mezgillerde toxtimastin herqaysi döletlerde mushu xildiki “Tughqanlar söhbet yighini” teshkillesh arqiliq xelq'araning eyibleshlirige taqabil turmaqchi boluwatqanliqi melum. Amérika hökümiti “Uyghur mejburiy emgikining aldini élish qanun layihesi” ni mutleq üstün awaz bilen maqullighandin kéyinki waqitqa toghra kelgen bu qétimqi söhbet yighinining uyushturulishimu mushu meqsette bolghan, dep qaralmaqta iken.

Halbuki, Uyghurlarning öz qorosigha tekshürüsh nuqtiliridin ötmey turup kirelmesliki yaki ularning chet ellerdiki uruq-tughqanliri bilen eng eqelliy bolghan téléfon alaqisidimu bolalmasliqi, nöwettiki zulum we basturushning qaysiy derijige bérip qalghanliqini biwaste körsetmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.