Uyghurlargha qaritiliwatqan wehshiylikte rol oynighanlarni jazalashqa munasiwetlik yéngi bir qanun layihesi tonushturuldi

Muxbirimiz irade
2022.08.04
Share on WhatsApp
Share on WhatsApp

Amérika kéngesh palata ezaliri Uyghurlargha yürgüzülüwatqan irqiy qirghinchiliq we mejburiy emgekke chétishliq kishilerge qaritilghan jazani kéngeytish meqsitide yéngi bir qanun layihesini otturigha qoydi.

Amérika kéngesh palata ezasi marko rubiyo (Marco Rubio) we bob ménéndéz (Bob Menendez) nöwettiki mewjut qanun'gha asasen Uyghurlarning hoquqini depsende qilishqa we mejburiy qul emgikige chétishliq shexsler jazalan'ghan teqdirdimu, ular bilen tijaret qiliwatqan shirketlerning hélihem amérikaning pul-mu'amile sistémisigha kireleydighanliqidek ehwalni nezerde tutup turup bir yéngi qanun layihesini otturigha qoyghan.

Sénator marko rubiyoning resmiy tor bétide élan qilin'ghan bayanatqa qarighanda “Qul emgiki qollighuchilirini jazalash qanuni” (Sanctioning Supporters of Slave Labor Act) dep atalghan bu qanun layiheside Uyghurlargha qaritiliwatqan zulumgha chétilghanlargha bérilidighan jazaning da'irisi kéngeytilidighan bolup, bu, jazalan'ghanlar bilen soda qiliwatqan we yardem qiliwatqan chet'el shirketlirini jazalashnimu öz ichige alidiken. Mezkur qanun layihesining awam palata nusxisini awam palata ezasi jim bankis tonushturghan.

Marko rubiyo ependi bayanatida mundaq dégen:

“Xitay kompartiyesining Uyghurlargha qaritiwatqan basturushining qorqunchluq tepsilatliri intayin toluq ispatlan'ghan. Bu jinayetlerde peqet biwasite mes'uliyiti bolghanlarni jazalashla kupaye qilmaydu, ularning qollighuchilirimu oxshashla jawabkarliqqa tartilishi kérek. Bu rezil qilmishlargha yol qoyghan herqandaq shexsning amérikaning pul-mu'amile baziridin nep élishigha yol qoymasliqimiz kérek”.

Kéngesh palata ezasi ménéndéz mundaq dégen:

“Xitay xelq jumhuriyitining shinjangdiki Uyghurlar we bashqa türkiy az sanliq milletlerge peskeshlerche irqiy qirghinchiliq yürgüzüwatqanliqi we Uyghurlarning mejburiy emgekke sélinishining yer shari teminlesh zenjirini buzuwatqanliqida shübhe yoq. Amérika hökümiti Uyghur kishilik hoquq siyasiti qanunidiki (Uyghur Human Rights Policy Act) belgilen'gen jazalar we bu qanun bergen hoquqqa asasen ish körüshi, ittipaqdashlirimiz we shériklirimiz bilen hemkarliship xitayning jinayi jawabkarliqini sürüshte qilishi kérek”.

Kéngesh palata ezaliri marko rubiyo we bob ménéndéz Uyghur kishilik hoquq siyasiti qanuniningmu otturigha qoyghuchiliri bolup, bu qanun Uyghurlargha a'it tunji maqullan'ghan qanun bolup hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.