Ройтирис: уйғур районида бихәтәрлик тәдбирлири сода тиҗарәткә путликашаң болмақта

Мухбиримиз шөһрәт һошур
2017-06-28
Елхәт
Пикир
Share
Принт

Ройтирис агентлиқи йеқинда, нөвәттә үрүмчидә яшаватқан вә һөкүмәт тәминлигән шараитлардин аз тола мәнпәәт еливатқан 20 кишини зиярәт қилип, уйғур райониниң нөвәттики вәзийити һәққидә мәлумат сориған.

Зиярәт қилинғучилар, нөвәттә уйғур районида йолға қоюлуватқан бихәтәрлик тәдбирлириниң районниң ишләпчиқириш вә сода ишлириға путликашаң болуватқанлиқи үстидә шикайәт қилған. Бир ресторан саһиби өзиниң бирқанчә ишчи-хизмәтчисиниң байрақ чиқириш паалийитигә қатнишиш үчүн җәнубтики юртиға қайтқанлиқини вә уни айлап сақлашқа мәҗбур болғанлиқини язса, йәнә бир зиярәт қилинғучи, сиясий өгиниш вә йиғин қатарлиқ паалийәтләргә көп зорлинип, зеһниниң вә вақтиниң көп қисмини өз тиҗаритигә аҗриталмайватқанлиқини ашкарилиған.

Хитай вә уйғурлардин тәркиб тапқан вә омумйүзлүк һалда кимликини ашкарилашни халимиған бу кишиләр, хитайниң нөвәттики иқтисадий сиясәтлиридин пәқәтла дөләт игиликидики чоң ширкәтләрниң пайдилиниватқанлиқини, оттура вә кичик типтики ширкәт вә карханиларниң иш вә содисиниң йеқиндин буян арқисиға қарап чекиниватқанлиқини илгири сүргән. Бир ширкәт саһиби бихәтәрлик тәдбири нами астида уштумтут интернет вә телифонлар кесилидиғанлиқи, бир қисим сода йиғилишлириниң ахирқи минутларда бикар қилидиғанлиқи, буниң сода-тиҗарәтни коп ақситиватқанлиқи қатарлиқларни баян қилған.

Ройтирис агентлиқиниң бүгүн бу һәқтә елан қилған мақалисидә хуласә сүпитидә, хитайниң иқтисадни тәрәққий қилдуруш билән муқимлиқни сақлаш арисида тәңпуңлуқни сақлиялмиғанлиқи йезилған.

Пикирләр (0)
Share
Толуқ бәт