Хитайниң бирлик сәп бөлүми уйғур районида "узун муддәтлик әминлик" бәрпа қилаламду?

Мухбиримиз җәвлан
2021-03-03
Share

"шинҗаң гезити" ториниң хәвиригә қариғанда, уйғур аптоном районлуқ бирлик сәп бөлүми йеқинда бирлик сәп бөлүм башлиқлири йиғини чақирип, "шинҗаңда узун муддәтлик әминликни ишқа ашуруш үчүн кишиләрниң қәлбини бирләштүрүш вә уюшуш күчини ашуруш" нишани бәлгиләнгән һәмдә бирлик сәп хизмитидә қолға кәлтүрүлгән нәтиҗиләр асасида кәлгүсидә йеңи вәзийәт яритип, районниң узун муддәтлик сиясий вә иқтисадий муқимлиқини қоғдаш тәкитләнгән.

Бу йиғинға аптоном районлуқ парткомниң муавин секритари, биңтуәнниң сиясий комиссари ваң җүнҗең қатнашқан вә "йирақни көзлигән сиясәтләр түзүш, муқимлиқни көзлигән тәдбирләрни йолға қоюш, қозғитишқа болидиған барлиқ актип амилларни ишқа селиш, иттипақлишишқа болидиған күчләрниң һәммиси билән иттипақлишиш вә шу арқилиқ шинҗаңниң узун муддәтлик әминликини ишқа ашуруш" һәққидә йолйоруқ бәргән.

Анализчиларниң қаришичә, хитай компартийәсиниң бирлик сәп хизмити дин, милләт вә охшимиған партийә-горуһларни өз әтрапиға топлап, уларни өз мәнпәәти үчүн хизмәт қилдурушни асас қилиду. Көп йиллардин буян бирлик сәп бөлүмлири хитайниң ички муқимлиқини сақлаштин һалқип, юмшақ күч васитилири арқилиқ хитайниң тәсирини хәлқараға кеңәйтиш үчүн хизмәт қилди. Ши җинпиң һоқуқ тутқандин кейин болса улар компартийәниң техиму күчлүк қоралиға айланди. Америка башчилиқидики ғәрб әллири буни тонуп йетип, хитайниң бирлик сәп бөлүми вә биңтуән әмәлдарлириға чәклимә қойди. Уйғур районидики бирлик сәп орунлири илгири миллий, диний мәсилиләрни юмшақ васитиләр билән һәл қилип кәлгән болса, әмдиликтә сахта ниқабини йиртип ташлап, компартийәниң диктаторлуқ аппаратиниң муһим васитилиридин биригә айланди. Бирлик сәп бөлүми хитай компартийәсиниң юмшақ күчигә вәкиллик қилсиму, әмәлийәттә хитайниң зораванлиқ җинайитигә шерик болуватқан бир орундур. Хитай компартийәси шуни билидуки, уйғур районидики "узун муддәтлик әминлик" һәргиз бирлик сәп бөлүминиң қандақтур "охшимиған қәлбләрни бирләштүрүш" усули билән әмәс, хитайниң қораллиқ күчи вә сақчилири арқилиқ ишқа ашиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт