Хитай армийәсиниң уйғур елида турушлуқ қисимлири һәрбий маневир қилған

Мухбиримиз ирадә
2016-12-08
Share

Хитайниң йәршари вақти гезитиниң чаршәнбә күнидики хәвиридә баян қилинишичә, хитай армийисиниң уйғур елида турушлуқ қисимлири йеқинда 10 миң кишилик һәрбий маневир елип барған. Уйғур елиниң қарақурум тағлиридики деңиз йүзидин 4000 метир егизликтики җайда елип берилған бу һәрбий маневирға һәрбий хадимлар билән бирликтә танка қатарлиқ нурғун һәрбий әслиһәләр қатнаштурулған.

Хәвәрдә бу қетимлиқ һәрбий маневир арқилиқ һәрбийләрниң егизликтики уруш қилиш иқтидариниң ашурулғанлиқи баян қилинған, әмма һәрбий маневирниң қайси күнлири, зади қәйәрдә елип берилғанлиқи ениқ тилға елинмиған.

Уйғур ели даирилири уйғур елида аталмиш “террорлуққа қарши күрәш” тә алдин зәрбә берип, тәшәббускарлиқ билән һуҗумға өтүшни тәкитләватқан бир мәзгилдә елип берилған бу уруш маневири диққәт қозғиди. Уйғур елиниң йеңи секретари чен чүәнго уйғур елидики армийә, қораллиқ қисимлар билән учришип, уларниң чегра районниң муқимлиқини қоғдаштики муһим әһмийитини тәкитлигән. Бирақ, чәтәлләрдики кишилик һоқуқ органлири уйғур елида турушлуқ қораллиқ қисимларни йүз бәргән вәқәләрни бастурушта “һәддидин зиядә күч қоллиниш” билән әйиблимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт