Уйғур дияридики мухбирларниң тәқиб нишани болуватқанлиқи тәнқидләнди

Мухбиримиз әзиз
2019-01-29
Елхәт
Пикир
Share
Принт

«Хитайдики чәтәл мухбирлири кулуби» 29-январ күни мәзкур кулубқа әза чәтәл мухбирлириниң хитайдики 2018-йиллиқ паалийәт әһвали тоғрисида йиллиқ доклат елан қилди. Мәзкур доклатта «һөкүмәтниң назарити вә биваситә чаңгал селиши сәвәблик мухбирларниң хитайдики хизмити изчил тосқунлуққа учрап кәлди. Шинҗаңдики мухбирларниң хизмити әң зор дәриҗидә тосалғуға учриди» дәп хуласә чиқирилған.

Мәзкур доклатта көрситилишичә, чәтәллик мухбирлар дуч келидиған әң зор тосалғуларниң бири хитай һөкүмитиниң һечнемидин һечнемә йоқла мухбирларға виза беришни рәт қилиши яки мухбирларниң визисини узартип беришни рәт қилиш әһвали икән. Бу қетим рай синашқа қатнашқан мухбирларниң 55 пирсәнти «мухбирлиқ қилиш шараити барғансери начарлап кетиватиду» дегән. Бирму киши бу җәһәттики әһвалда илгирикидин яхшилиниш болғанлиқини әслийәлмигән.

«Хитайдики чәтәл мухбирлири кулуби» ниң рәиси ханна салберг бу һәқтә сөз қилип, «кәң көләмлик назарәт вә хәвәр мәнбәлиригә болидиған бесим сәвәблик мухбирлар нишан қилған җайға бармай турупла хәвәр ишләштин вазкечишкә мәҗбурланмақта» дегән. Уйғурлар дияридики лагерлар вә сиясий вәзийәт һәққидә хәвәр ишлигән «базфид хәвәрлири» ниң бюро мудири мега раҗагопалан, австралийә радийо ширкитиниң мухбири масю карней қатарлиқлар бирдәк виза җәһәттә «җазаланған». Масйо карней бу һәқтә сөз қилип «телефонумда сақчиларниң г-маил һесабатимни ачқанлиқи вә бир қисим һөҗҗәтләрни юювәткәнликигә шаһит болдум» дегән.

Мәзкур доклатта көрситилишичә, уйғурлар дияриға барған 27 мухбирниң 24 нәпири сақчиларниң паракәндичиликигә учриған; уларниң 19 нәпиригә сақчилар «компютер вә син аппаратлиридики материялларни өчүрүветиш» тәлипини қойған; 23 нәпириниң арқисиға ашкара һалда адәм чүшкән.

Һалбуки, хитай ташқи ишлар министирлиқиниң баянатчиси гең шуаң бу һәқтә мухбирларниң соалиға җаваб берип «бу доклат тәнқидләшкиму әрзимәйду. Чәтәл мухбирлириниң дөлитимиздики барлиқ һоқуқлири толуқ қануний капаләткә игә» дегән.

Пикирләр (0)
Share
Толуқ бәт