Канадалиқ журналист йәкән елишқуда тутқун қилишқа учриди

Мухбиримиз ирадә
2017-08-24
Елхәт
Пикир
Share
Принт

Канадалиқ мухбир натхан вәндирклиппи йәкәнниң елишқу базирида сақчиларниң тутқун қилишиға учриған.

Хәвәрләрдин мәлум болушичә, канаданиң «йәршари вә мәктуплар гезити» ниң мухбири натхан вәндерклиппи 23-авғуст чаршәнбә күни ахшамға йеқин йәкәнниң елишқу йезисиға барған. У йәрликләрни зиярәт қилип 15 минут өтә-өтмәйла сақчилар тәрипидин қоршивелинған вә кейин тутқун қилинип сақчиханиға апирилған. Сақчилар униң сомкиси вә камералирини тәкшүргән.

Вәндирклиппи елишқу сақчиханисида үч саәттәк тутуп турулғандин кейин, пәйшәнбә күни сәһәргә йеқин қоюветилгән болсиму, униң компютерини кейин әвәтип беридиғанлиқини ейтип тутуп қалған. Мәлум болушичә, у сақчиларниң һәмраһлиқида қәшқәрдә чүшкән меһманханисиға йетип кәлгән.

Вәқәдин кейин, пәйшәнбә күни «йәршари вә мәктуплар гезити» баш тәһрири давид валмслий баянат елан қилип, вәқәни әйиблиди. У сөзидә, 2009-йили мәзкур гезитниң йәнә бир мухбириниңму охшаш вәқәгә учриғанлиқини әскәртип «бу бизниң мухбирлиримизниң районда иккинчи қетим мушундақ зораванлиққа учриши болуп һесаблиниду. Шуниси ениқки, у йәрдә йезилишни күтүп турған нурғун һекайиләр бар» дегән.

Вәқә тивиттер торидиму нурғун инкас қозғиди. Уйғур ели вәзийитини йеқиндин көзитип келиватқан нурғун көзәткүчиләр вәқәни хитай һөкүмитиниң уйғур елидики учурни қамал қилиш һәрикитиниң күчлүк бир испати, деди.

Пикирләр (0)
Share
Толуқ бәт