Uyghur rayonida 24 yéngi yuqumdar bayqalghan, ürümchi yenila qamalda turmaqta

Muxbirimiz jewlan
2022.09.07
Share on WhatsApp
Share on WhatsApp

“Xitay xewerliri tori” ning 6-séntebir chiqarghan xewirige qarighanda, 9-ayning 6-künigiche Uyghur rayonida yéngidin yuqumlan'ghan alametsiz yuqumdarlar sani 24 ke yetken. Buning ichide ürümchide 7, ghulja shehiride 12, shixo shehiride 2, qutubi nahiyeside 1, korla shehiride 2 yuqumdar köpeygen؛ 4 adem doxturxanidin chiqqan, 17 adem ayrim közitishtin chiqqan.

Bu xewerde “Shinjangda hazirghiche késellik diyagnozi qoyulghanlar 16 adem, alametsiz yuqumdarlarning omumiy sani 603 adem” déyilgen. Xitay taratqulirining ötkenki melumatlirida omumiy yuqum sani 3000 din éship ketkenidi, emdi bu san tuyuqsiz azlap ketken.

Halbuki, 7-séntebir küni ürümchining yuqum weziyiti heqqide chiqqan bir xewerde, ürümchide 6 rayon “Yéngidin köpeygen xeterlik rayon” dep békitilgen. Tengritagh rayoni, yéngi tereqqiyat rayoni, bulaqtagh rayoni (shüymogo rayoni) we köktagh rayoni (midung rayoni) diki bir mehelle “Éghir xeterlik rayon” dep békitilgen؛ köktagh rayonidiki ikki mehelle “Otturahal xeterlik rayon” dep békitilgen.

Xewerlerdin melum bolghinidek, yuqum éghir dep qaralghan “Xeterlik rayon” lar qattiq qamal qilinidighan bolup, ahaliler olturaq rayonigha kirip-chiqishmu qattiq cheklen'gen. Ichikiri xitayda yüz berginige oxshash, bundaq “Xeterlik rayon” da yashawatqan Uyghurlarning turmushining téximu qiyin bolidighanliqi, acharchiliq we mehkumluq azabi tartidighanliqi mölcherlenmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.