Wang yi türkiye we pakistan bilen sözliship, talibanni “Sherqiy türkistan islam herkiti” ge zerbe bérishke chaqirghan

Xitay tashqiy ishlar ministiri wang yi türkiye tashqiy ishlar ministiri mewlut chawush'oghlu we pakistan tashqiy ishlar ministiri shah mahmut qureshi bilen téléfonda sözliship, talibanning “Sherqiy türkistan islam herkiti” ge zerbe bérishini telep qilghan. Xitay tashqiy ishlar ministirliqining ashkarlishiche, wang yi ular bilen 18-awghust küni sözleshken.

Xelq'ara közetküchiler afghanistanda “Sherqiy türkistan islam herikiti” ning mewjutliqi gumanliq, dep qarisimu, shundaqla amérika hökümiti ötken yili bu teshkilatni “Térorliq teshkilatlar tizimliki” din chiqiriwetken bolsimu, lékin xitay bu teshkilatni ‍izchil halda “Ré'al tehdit” dégende ching turup kelken.

Yéqinda talibanlarning afghanistanni kontrol qilishi bilen xitay hökümiti derhal talibanlarni qollaydighanliqi, biraq talibanning “Sherqiy türkistan islam herikiti” ni yoqitishini telep qilghan.

Közetküchilerning éytishiche, xitay sherqiy türkistan islam herkitini dawamliq “Ré'al térorluq tehditi” dep körstish arqiliq ‍özining Uyghurlargha qarita élip barghan irqiy qirghinchiliqini yépishqa urunmaqta iken.

Wang yining sözlirige chawush'oghlu we qureshining qandaq inkas qayrurghanliqi melum emes. Xitay tashqiy ishlar ministirliqining éytishiche, wang yi chawush'oghlugha: “Afghan talibanliri barliq térorliq küchliri bilen bolghan alaqisini éniq ‍üzüshi we tedbir qollinip, b d t xewpsizlik kéngishi teripidin qararlashturulghan xelq'ara térorliq teshkilatliri, jümlidin sherqiy türkistan islam herkitini basturushi kérek,” dégen.

U qureshi bilen sözleshkende, “Herqaysiy terepler afghanistanning térorluqqa zerbe bérishini qollishi, afghanistanning qaytidin térorluq teshkilatlirining bazisigha aylinishigha yol qoymasliqi” ni telep qilghan.