Икки уйғур яш велисипит билән 6 миң километирлиқ сәпәргә атланди

Мухбиримиз үмидвар
2016.10.16
Share on WhatsApp
Share on WhatsApp


Йеқинда икки уйғур велисипит билән җеҗяң өлкисиниң йиву шәһиридин үрүмчигә бериш сәпиригә атланған болуп, уларниң велисипит билән 6000 километирдин артуқ мусапини бесип өтмәкчи болуши уйғурлар арисида күчлүк қизиқиш қозғиған.

“нур тори” қатарлиқ уйғур торлирида хәвәр қилинишичә, әсли йиву шәһиридә туруп тиҗарәт қиливатқан мәзкур икки уйғур яш 9 - айниң 21 - күни сәпәргә атланған болуп, улар, икки ай ичидә үрүмчигә йетип беришни пилан қилған.

Улар җаңши, хубей, хенән сәнши, гәнсу өлкилирини бесип өтидикән, шуниңдәк шиңшиңшядин таки қумулғичә болған арилиқтики адәм шалаң, чөллүк йоллириниму велисипит билән бесип өтүп, әң ахирқи мәнзил үрүмчигә йетип келидикән.

“нур тори” қатарлиқ уйғур тор бәтлиридә мәзкур икки уйғур йигитниң сәпәр сүрәтлирини арқиму - арқидин елан қилинған болуп, мәлум болушичә, улар учисиға велисипит тәнһәрикәтчилири кийидиған кийимдин башқа йәнә “җуңго” дегән хитайчә чоң хәт бесилған майкиларни кийгән, велисипитлириға хитай дөләт байриқини есивалған,һәтта йол үстидә йәнә башқа уйғурлар билән бирликтә хитай дөләт байриқини тутуп сүрәтләргә чүшкән.

Мәзкур икки уйғурға аит бу хәвәр уйғур дияриниң ичи - сиртидики уйғурларниң қизиқишиға еришкән болуп, бир қисим тор бәтләрдә инкас язғанлар уларниң ғәйритигә апирин оқуған. Әмма, чәтәлләрдики бир қисим уйғурлар болса, бу икки йигитниң “җуңго” дегән хитайчә хәт йезилған майка кийивелиши вә велисипитлириға хитай дөләт байрақлирини есивелишиниң өзлирини қоғдаш үчүн икәнликини тәһлил қилишмақта. Исмини ашкарилашни халимиған бир көзәткүчиниң ейтишичә, бәлки бу икки уйғур яш йол үстидә сақчилар вә аһалиларниң өзлиридин гуманлинип,тосалғу һәм аваричилиқ пәйда қилишидин сақлиниш үчүн шундақ қилған болуши мумкин, чүнки, йеқинқи вақитларда бәзи ичкири хитай өлкилиридики йәрлик сақчи органлири уйғурларни көрсә мәлум қилиш, һәтта уларға ятақ бәрмәслик қатарлиқ уқтурушларни чиқарған иди.

Мәлум болушичә, уйғурларниң мундақ узун,җапалиқ сәпәрләргә тәвәккул қилиши буниңдин он нәччә йил илгири уйғур қизи гөлзөһрә тәклимакан чөлидин йүгүрүп өтүш сәпиригә атлиниш билән башланған болуп, у шу чағда хәлқ тәрипидин “тәклимакан мәликиси”дәп тәрипләнгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт