Хәлқара кәчүрүм тәшкилати төһпикар журналист вә муһәррир қурбан мамутни қоюп беришни чақириқ қилди

Хәлқара кәчүрүм тәшкилати 22-июн күни чақириқ елан қилип, төһпикар журналист, “шинҗаң мәдәнийити” журнилиниң сабиқ баш муһәррири қурбан мамутни қоюп беришни тәләп қилиш һәрикити башлиған.

Хәлқара кәчүрүм тәшкилатиниң тәкитлишичә, 70 яшлиқ қурбан мамутниң яшинип қалғанлиқи, у тоғрилиқ һечқандақ учурниң болмаслиқи униң әһвалиға қарита җиддий әндишә пәйда қилмақта икән. Қурбан мамут 2017-йили 2-айда америкадики оғлини зиярәт қилип қайтқан. Униң шу йили 11-айдин башлап һечқандақ из-дерики болмиған. Радийомиз йеқинда қурбан мамутниң тутулуп кәткәнликини дәлиллигән иди.

Хәлқара кәчүрүм тәшкилатиниң тәкитлишичә, униң америкадики оғли бәһрам синташ “хитайниң дадисини тутқун қилишиға униң америкада туғқанлириниң болуши сәвәб болған,” дәп қарайдикән. Хәлқара кәчүрүм тәшкилати 22-июн елан қилған чақириқида кишиләрниң үрүмчи шәһәрлик җамаәт хәвпсизлик идарисиниң башлиқи тав хоңҗүңә хәт йезип, қурбан мамутниң ақиветини сүрүштүрүшини тәләп қилған.

Униң тәкитлишичә, хитай һөкүмити “хәлқарада етирап қилинған бирәр җинайәт садир қилғанлиқиға даир йетәрлик, ишәнчлик, қайил қиларлиқ пакит болмиғучә уни қоюп бериши; униң хәлқара өлчәмләр бойичә адил сотлинишиға капаләтлик қилиши; униң қәйәрдә икәнликини ашкарилиши; аилиси билән көрүшүши вә адвокат тәклип қилишиға йол қоюши; униң тән җазаси вә қопал муамилигә учримаслиқиға капаләтлик қилиши керәк,” икән. Хитайниң 2017-йили башланған чоң тутқунида уйғур җәмийитидики қабил зиялийлар, тиҗарәтчи вә диний өлималар асаслиқ зәрбә бериш нишаниға айланған. Қурбан мамут “шинҗаң мәдәнийити” журналиниң баш муһәррири мәзгилидә бу журнал уйғур мәдәнийити вә пикир-еқиминиң тәрәққиятида авангартлиқ рол ойниған иди.