Xelq'ara kechürüm teshkilati töhpikar zhurnalist we muherrir qurban mamutni qoyup bérishni chaqiriq qildi

Muxbirimiz erkin
2020.06.22

Xelq'ara kechürüm teshkilati 22-iyun küni chaqiriq élan qilip, töhpikar zhurnalist, “Shinjang medeniyiti” zhurnilining sabiq bash muherriri qurban mamutni qoyup bérishni telep qilish herikiti bashlighan.

Xelq'ara kechürüm teshkilatining tekitlishiche, 70 yashliq qurban mamutning yashinip qalghanliqi, u toghriliq héchqandaq uchurning bolmasliqi uning ehwaligha qarita jiddiy endishe peyda qilmaqta iken. Qurban mamut 2017-yili 2-ayda amérikadiki oghlini ziyaret qilip qaytqan. Uning shu yili 11-aydin bashlap héchqandaq iz-dériki bolmighan. Radiyomiz yéqinda qurban mamutning tutulup ketkenlikini delilligen idi.

Xelq'ara kechürüm teshkilatining tekitlishiche, uning amérikadiki oghli behram sintash “Xitayning dadisini tutqun qilishigha uning amérikada tughqanlirining bolushi seweb bolghan,” dep qaraydiken. Xelq'ara kechürüm teshkilati 22-iyun élan qilghan chaqiriqida kishilerning ürümchi sheherlik jama'et xewpsizlik idarisining bashliqi taw xongjünge xet yézip, qurban mamutning aqiwétini sürüshtürüshini telep qilghan.

Uning tekitlishiche, xitay hökümiti “Xelq'arada étirap qilin'ghan birer jinayet sadir qilghanliqigha da'ir yéterlik, ishenchlik, qayil qilarliq pakit bolmighuche uni qoyup bérishi؛ uning xelq'ara ölchemler boyiche adil sotlinishigha kapaletlik qilishi؛ uning qeyerde ikenlikini ashkarilishi؛ a'ilisi bilen körüshüshi we adwokat teklip qilishigha yol qoyushi؛ uning ten jazasi we qopal mu'amilige uchrimasliqigha kapaletlik qilishi kérek,” iken. Xitayning 2017-yili bashlan'ghan chong tutqunida Uyghur jem'iyitidiki qabil ziyaliylar, tijaretchi we diniy ölimalar asasliq zerbe bérish nishanigha aylan'ghan. Qurban mamut “Shinjang medeniyiti” zhurnalining bash muherriri mezgilide bu zhurnal Uyghur medeniyiti we pikir-éqimining tereqqiyatida awan'gartliq rol oynighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.