Ши җинпиңниң орунбасари дәп қаралған бир хитай рәһбәр вәзиписидин қалдурулған

Мухбиримиз җүмә
2017-07-15

Вал стрет журнили гезитиниң хәвәр қилишичә, хитай рәиси ши җинпиңниң орунбасари болуп қелиши мумкин дәп қаралған бир хитай рәһбәр вәзиписидин қалдурулған.

Хәвәрдә бу қарарниң ич йүзидин хәвәрдар кишиләрниң ейтқанлиридин нәқил елип көрситишичә, чуңчиң шәһириниң партком секретари, хитай сиясий бюроси әзаси сун җеңсәй шәнбә күни туюқсиз вәзиписидин қалдурулуп, тәкшүрүлүшкә башлиған. Қарар шәнбә күни чуңчиң шәһәрлик партийә рәһбәрлики арисида җиддий чақирилған бир йиғинда уқтурулған. Хитай ахбаратлириму мәзкур қарар һәққидә хәвәр бәргән болсиму, әмма униң вәзиписидин елинишиға сәвән болған амиллар һәққидә һечқандақ изаһат бәрмигән.

Сун җеңсәй хитай мәркизий сиясий бюросидики әң нопузлуқ 25 әзаниң бири икән. Вал стрет журнили гезитидә берилгән мулаһизигә қариғанда, анализчилар вә хитай компартийисиниң ички ишлиридин хәвәрдар кишиләр сунниң кәлгүсидә сиясий бюро даимий комитетиға өстүрүлүп, хитай рәиси ши җинпиңниң орниға чиқиши мумкинлики наһайити юқири болған бири икәнликини билдүрүшкән.

Хәвәрдә көрситишичә, йәнә бир нөвәт хитайға рәис болушни көзләватқан ши җинпиң партийә рәһбәрлики ичидики өзигә риқабәтчи болалайдиған кишиләрни мәркәздин йирақлаштурушқа тиришмақта икән. Ши җинпиңниң сун җеңсәйни вәзиписидин қалдуруши, униң 2020-йили 2-қарар рәислик муддити тошқандин кейинму һоқуқни чаңгилида тутуп турушни көзләватқанлиқидин дерәк беридикән. Сунниң орниға ши җинпиңниң қәдинас тости, гуйҗу өлкисиниң партийә секретари чен минер тәйинлигән.

Чуңчиң хитайдики мәркәзгә биваситә қарашлиқ 4 чоң шәһәрниң бири. Сун җеңсәй ши җинпиң һакимийити дәвридә мәзкур шәһәрниң партком секретарлиқ вәзиписини атқуруш давамида моллақ атқан иккинчи шәхс. Чуңчиңниң сабиқ партком секретари бө шиләйму 2012-йили “чириклик” вә “һоқуқни қалаймиқан ишлитиш” җинайәтлири билән әйиблинип, муддәтсиз қамақ җазасиға һөкүм қилинған.Сун җеңсәй 2012-йили ноябиридин башлап мәзкур шәһәргә вәзипигә тәйинләнгән иди.