Америка деңиз армийәси: «хитайниң қораллиқ белиқчилириға хитай армийәси қатарида муамилә қилимиз»

Мухбиримиз әркин
2019-04-30
Елхәт
Пикир
Share
Принт

Америка деңиз армийәси хитай даирилирини агаһландуруп, униң саһил қоғдаш әтрәтлиригә вә қораллиқ белиқчилириға хитай армийәси қатарида муамилә қилидиғанлиқини билдүргән.

«Малийә вақти гезити» ниң 29‏-апрел ашкарилишичә, америка деңиз армийәси уруш қилиш идарисиниң башлиқи адмирал җон ричардсон бу йил 1‏-айда хитай деңиз армийәсиниң мәсули билән көрүшкәндә униңға «наһайити ениқ қилип», «америка деңиз армийәсиниң бу зорлуқ-зомбулуққа йол қоймайдиғанлиқи» ни билдүргән. Хитай һөкүмити өзиниң деңиз саһилини қоғдаш сақчи әтрити вә қораллиқ белиқчи кемилирини ишқа селип, америка деңиз армийәсиниң җәнубий деңизда әркин деңиз қатниши мәшғулати елип беришиға изчил кашила туғдуруп кәлгән иди.

«Малийә вақти гезити» ниң мутәхәссисләрдин нәқил кәлтүрүшичә, америка бу арқилиқ «хитайниң деңиз қатнишини қалаймиқан қилиш қилмишиға һәйвисини көрситип қоюшни үмид қилидикән».

Хитай һөкүмити җәнубий деңизниң асасән пүткүл қисмида игилик һоқуқи барлиқини илгири сүрүп, бу райондики нурғун аралларға һәрбий әслиһәләрни орунлаштурған. Лекин америка хитайниң бу районға болған игилик һоқуқ тәлипини рәт қилип, деңиз армийәсиниң һәрбий мәшғулатини күчәйткән. Буниңға қарита хитай өзиниң деңиз саһил сақчи әтрәтлирини вә қораллиқ белиқчи кемилирини ишқа селип кәлгән. Америкалиқ мутәхәссисләрниң «малийә вақти гезити» гә билдүрүшичә, америка деңиз армийәсиниң уларға кашила қилип келиватқан қораллиқ хитай белиқчи кемилиригә вә деңиз сақчи әтритигә һәрбий қисим қатарида муамилә қилиши, хитайға берилгән кечлик агаһландуруш икән. Хәвәрдә, буниң хитайниң җәнубий деңиздики зорлуқ-зомбулуқиға тақабил туруш йолида бесилған җәсур қәдәм икәнлики, лекин шуниң билән биргә буниң мәзкур районда қораллиқ тоқунуш партлаш хәвпини күчәйтидиғанлиқи тәкитләнгән.

Америка деңиз армийәси җәнубий деңизда юқириқи қарарни қобул қилипла қалмай, бәлки йәнә тәйвән боғузида өз һәрикитини күчәйткән. Америка дөләт мудапиә министирлиқиниң дүшәнбә күни ашкарилишичә, йәкшәнбә күни икки данә америка уруши парахоти тәйвән боғузидин кесип өткән.

Пикирләр (0)
Share
Толуқ бәт