Xitay ayrodromlarda bixeterlik tedbirlirini kücheytti

Muxbirimiz erkin
2016-03-25
Share

Xitay hökümiti bélgiye térrorluq hujumgha uchrighandin kéyin ayrodromlarda bixeterlik tedbirlirini qattiq kücheytken. Xitay xelq hawa qatnash idarisi, "Bu tedbirler bélgiyede yüz bergen térrorluq hujum seweblik élin'ghanliqi" ni bildürgen.

Bir ayrodrom xadimining firansiye agéntliqigha bildürüshiche, amanliq tedbiri xitaydiki barliq ayrodromlarda kücheytilgen. Xewerde, xitay amanliq xadimlirining béyjing, shangxey, chéngdu qatarliq sheherlerdiki ayrodrom zallirining sirtida bezi yoluchilarni toxtitip, somka, yük-taqilirini tekshürüwatqanliqini bildürgen.

D u q ilgiri xelq'ara yaki xitayda yüz bergen her qétimliq zor weqede Uyghurlar xitay amanliq xadimlirining nuqtiliq tekshürüsh nishanigha aylinip qalidighanliqini tenqidlep kelgen idi.

Firansiye agéntliqining xewiride, tekshürüsh nishani Uyghurlargha qaritilghanliqini tilgha almighan. Emma "Yéqinqi yillardin buyan musulman Uyghurlarning wetini shinjangda zorawanliq weqelirining küchiyip ketkenliki" ni eskertken.

Xewerde yene, xitay hökümiti zorawanliq weqelirini islamchi térrorchilargha artsimu, emma kishilik hoquq teshkilatlirining bu weqelerni kemsitish, Uyghur diniy we medeniyitini kontrol qilish keltürüp chiqarghan, dep qaraydighanliqini alahide tekitligen.

Xitay hökümiti ötken yili 11‏-ayda parizhda yüz bergen térrorluq hujumini buningdin 2 ay awwal aqsu soghan kömür kénida yüz bergen hujumgha baghlap chüshendürüshke urun'ghan bolsimu, emma bu firansiyelik zhurnalist ursula gotiyirning reddiyesige uchrighan idi.

Charshenbe küni biryussélda yüz bergen térrorluq hujumda 31 adem öltürülgen. Hujumni iraq we süriyediki térrorluq guruh - "Da'ish" özining élip barghanliqini élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.