Хитай 1 - айда 2000 дин артуқ кадириға “интизамға хилаплиқ қилиш” җазаси берилгәнликини елан қилди

Хитайниң җоңгу хәвәрләр ториниң 24 - февралдики хәвиридин мәлум болушичә, 2015 - йил 1 - ай ичидә “8 маддилиқ кадирлар интизами” ға хилаплиқ қилмишлардин пүтүн мәмликәт бойичә 1650 мәсилә байқалған, 2133 нәпәр һөкүмәт кадириға чарә көрүлгән.

Хәвәрдә дейилишичә, 2015 - йилдин башлап, мәркизи һөкүмәт бәлгилигән “8 маддилиқ кадирлар интизами” ға хилаплиқ қилип җазаланғанлар сани истатистика қилинип, һәр айниң ахири торда ашкарә елан қилиш йолға қоюлидикән. Хәврдә йәнә “8 маддилиқ кадирлар интизами”ға изаһат берилип, “бу мәркизи һөкүмәтниң һөкүмәт кадирлирида барғанчә әвҗ еливатқан чириклик қилмишини тосуш үчүн йолға қоюлған йеңи тәдбир” дейилгән.

Йеқинқи йилларда хитайда барғанчә әвҗ алған парихорлуқ - чириклик қилмиши пуқраларни нарази қилип, хитай мәркизи һөкүмитиниң бешини ағритидиған мәсилиләрниң биригә айланған. 2013 - Йил йил ахири дөләт рәиси ши җинпиң һөкүмәт кадирлиридики парихорлуқ - чириклик қилмишлириға қаттиқ зәрбә берилидиғанлиқини җакарлиған иди.

Мәлум болушичә, бултур бир йил ичидә хитайда юқириси өлкә дәриҗиликтин төвини йеза кадирлириғичә тәхминән 200 миңдин артуқ һөкүмәт кадири җазаға учриған. Буларниң ичидә өлкә дәриҗиликтин юқири әмәлдарларниңла 60 тин ашидиғанлиқи елан қилинған иди.