Хитай даирилири 10 хил кишиләрниң айропиланға чиқишини чәклимәкчи

Мухбиримиз әркин
2018-04-06
Елхәт
Пикир
Share
Принт

Йеқинда хитайниң дөләтлик ислаһат-тәрәққият комитети, хәлқ авиатсийә идариси, алий сот, малийә министирлики қатарлиқ органлири ортақ һөҗҗәт чүшүрүп, 10 хил кишиләрниң айропиланға чиқишини чәкләйдиғанлиқини елан қилған.

Хитай ахбарат васитилириниң хәвәр қилишичә, «айропиланда еғир сәвәнлик садир қилған кишиләрни чәкләш, иҗтимаий кридит системиси қурулуши алға сүрүш һәққидики пикир» намлиқ һөҗҗәтниң 1‏-майдин башлап иҗра қилинидиғанлиқини билдүргән.

Һөҗҗәттә көрситишичә, террорлуққа даир сахта учур тарқитиш вә ойдуруш, сахта кимлик ясаш, башқиларниң кимликини ишлитиш, айродромда қалаймиқанчилиқ пәйда қилиш, чәкләнгән буюмларни елип меңиш, айропиланида тәртипсизлик қилиш, яки айропиланниң йолини тосуш, айропилан хадимлириға тосқунлуқ қилиш, уларға тәһдит селиш, айропиланниң ичидә җедәл-маҗира чиқириш қатарлиқ қилмишларни садир қилған шәхсләрниң айропиланға олтуруши чәклинидикән.

Мәзкур бәлгилиминиң уйғурларға қанчилик тәсир қилидиғанлиқи мәлум әмәс. Лекин, дуня уйғур қурултийиниң қаришичә, бу бәлгилимә уйғурларға қаттиқ тәсир көрситип, уларниң айропиланға олтуруп саяһәт қилишини техиму қийинлаштуриду.

Д у қ ниң рәиси долқун әйса җүмә күни мәзкур бәлгилимигә инкас билдүрүп, «бу йеңи бәлгилимә уйғурларниң айропиланға олтуруши, хитай чеграси ичидиму бир шәһәрдин бир шәһәргә бериш һоқуқиниңму қаттиқ чәклинидиғанлиқини көрситиду» деди.

Хитай һөкүмити бурундинла уйғурларниң айропиланға олтуруп сәпәр қилишини қаттиқ контрол қилип, уларға алаһидә бихәтәрлик тәкшүрүш түзүми йүргүзүп кәлди. Көзәткүчиләрниң илгири сүрүшичә, хитай һөкүмити миллий вә диний хаһиши күчлүк нурғун уйғурларни ишәнчсиз кишиләр тизимликигә киргүзүп қоюп, уларни айропиланға олтуруп сәпәр қилалмайдиған әһвалға чүшүрүп қойған икән.

Пикирләр (0)
Share
Толуқ бәт