Xitay diplomatliri chet'el hökümetlirining teywen saylimigha bolghan inkaslirini tenqid qildi

Xitay tashqi ishlar ministirliqi we xitayning chet'ellerdiki diplomatiye organliri  13-yanwar shenbe küni teywendiki pirézidént saylimida ghelibe qilip, pirézidéntliqqa saylan'ghan teywen démokratiye we tereqqiyat partiyesining namzati léy chingdéni tebrikligen chet'el hökümetlirini eyibligen. Roytérs agéntliqining xewer qilishiche, béyjing chet'el hökümetlirining teywendiki saylamni tebriklishi teywen'ge qanuniyliq ata qilidu, dégen endishide derhal inkas qayturghan. Xitay tashqi ishlar ministirliqi 15-yanwar amérika tashqi ishlar ministiri bilinkénning bayanatigha inkas qayturup, uning sözining “Teywen musteqil bölgünchi küchliri” ge  “Jiddiy xata signal béridighanliqi” ni ilgiri sürgen. Bilinkén léy chingdéni tebriklesh bilen bir waqitta, washin'gtonning teywen bilen bolghan munasiwitini téximu algha sürüshni kütidighanliqini éytqan.

Xitayning londonda turushluq elchixanisi 14-yanwar küni élan qilghan bayanatida, en'gliye tashqi ishlar ministiri kaméronning léy chingdéni tebriklishi we  uning saylamni “Teywenning janliq démokratiyesining bir delili” dep teriplishini “Toghra bolmighan heriket” dep körsetken.

 Xitayning yaponiyediki elchixanisi bolsa yaponiye hökümitige resmiy diplomatiyelik naraziliq bildürüp, yaponiye terepning “Teywen boghuzidiki tinchliq, muqimliqqa, shuningdek xitay yaponiye munasiwitige kashila qilmasliqi” ni telep qilghan. Buning aldida, yaponiye tashqi ishlar ministiri yoko kamikawa, teywenni “Pewqul'adde muhim shérik we intayin muhim dost” dep teriplep, lékin teywen bilen bolghan xizmet munasiwitining “Gheyriy hökümet asasida” ikenlikini bildürgen. Roytérs agéntliqining xewiride yene 15-yanwar küni misir paytexti qahirede ziyarette bolghan xitay tashqi ishlar ministiri wang yiningmu “Bir xitay siyasiy” ge xilapliq qilghan döletlerni agahlandurghanliqi bildürülgen. Roytérsning  éytishiche, xitayning firansiye, awstraliye qatarliq döletlerdiki elchixanilirimu, bu döletlerning teywendiki saylamni tebriklishige naraziliq bildürgen. Shenbe künidiki saylamda, teywen démokratiye tereqqiyat partiyesining namzati léy chingdé, 40 pirsenttin artuq awaz bilen saylamning ghelibisige érishken.