Хитай даирилири дөләт байрими мәзгилидә идарә башлиқлириниң мәсулийитини тәкитлиди

Мухбиримиз меһрибан
2016.09.27

Хитайниң “шинҗаң гезити”ниң 27- сентәбир сәйшәнбә күнидики хәвиридә, хитай мәркизи һөкүмитиниң қарари билән дөләт байримида 7 күнлүк дәм елиш орунлаштурулғанлиқи, бу мәзгилдә уйғур аптоном районида алаһидә уқтуруш чиқирилип, бир һәптилик дөләт байримилиқ дәм елиш мәзгилидә қаттиқ бихәтәрлик тәдбирлири елиш тәкитләнгәнлики илгири сүрүлди. Хәвәрдин мәлум болушичә, һәрқайси идариләрниң 1- қол башлиқлиридин байрам мәзгилидики бихәтәрлик мәсулийити қаттиқ сүрүштүрүлидиғанлиқи тәкитләнгән.

Инкаслардин мәлум болушичә, бу йиллиқ қурбан һейт мәзгилидиму уйғур аптоном районлуқ һөкүмәт мусулманларниң диний байрими қурбан һейтниң хитайниң әнәниви байрими тавуз чағини билән бир вақитқа тоғра кәлгәнлики үчүн, 9-сентәбирдин 16-сентәбиргичә 7 күн дәм елишқа қоюп берилидиғанлиқини елан қилип, байрам мәзгилидә бихәтәрлик тәдбирлири күчәйтилидиғанлиқини билдүргән болсиму, әмма қурбан һейт һарписида, йәни, 9- сентәбир күни хотәнниң гума наһийисидә партлаш вәқәси йүз бәргән иди.

Игилинишичә,9-сентәбир күни гумада йүз бәргән бу вәқәдә сақчи идарисиниң муавин башлиқи қатарлиқ бирқанчә сақчи йәрлик бомба ясиливатқанлиқи һәққидә учур елинған бир гәмини тәкшүрүш җәрянида партлитиш һуҗумиға учрап һаятидин айрилған.

Хәлқара таратқулардики мәзкур вәқә һәққидә берилгән хәвәр анализлирида вә көзәткүчиләрниң инкаслирида бу қетимқи партлашниң хитай мәркизи һөкүмити тәрипидин уйғур дияриға йеңидин бәлгиләнгән партком секретари чен чүәнго өзиниң районда муқимлиқини күчәйтиш үчүн қаттиқ зәрбә бериш сияситини давамлаштуридиғанлиқини елан қилип, бир ай болмайла йүз бериши даириләрниң уйғурларға қаратқан қаттиқ қол сияситиниң әксичә үнүм берип, райондики наразилиқ вә қаршилиқ кәйпиятини күчәйтиватқанлиқи илгири сүрүлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.