Калифорнийәдә 100 дәк өйни әпйүн етизиға айландурувалған хитай җинайәт гуруһи тармар қилинған

Мухбиримиз ирадә
2018-04-05
Share

Америкиниң калифорнийә штатлиқ сақчи даирилири чаршәнбә күни шималий калифорнийә районида 100 дәк өй сетивелип, уни қанунсиз һалда әпйүн өстүридиған вә ишләпчиқиридиған җайға айландурувалған бир хитай җинайәт гуруһини паш қилған.

«Демократик ахбарат» гезитиниң хәвәр қилишичә, шималий калифорнийә штатидики бу өйләр гәрчә америкида қанунлуқ туруватқан хитайлар тәрипидин сетивелинған болсиму, әмма улар өй сетивалғанда ишләткән пуллириниң һәммиси хитайниң фуҗйән өлкисидин әвәтилгән икән. Өй сетивалғучи хитайлар америкиниң ню-йорк, җорҗийә, охаййо, пинсилванийә қатарлиқ штатлиридин калифорнийәгә йиғилған һәмдә бу өйләрдә терилған вә пишшиқлап ишләнгән әпйүнләрни йәнә юқириқи штатларға йөткигән.

Америка федирал сақчи даирилириниң мухбирларға ашкарилишичә, юқириқи өйләрниң худди бир кәсипләшкән «йеза-игилик санаити» етизлириға айландурулғанлиқини, бундақ көлими зор қанунсиз әпйүн өстүрүш һадисисиниң америка тарихида көрүлүп бақмиғанлиқини билдүргән.

Нөвәттә сақчи даирилири калифорнийәдин өй сетивалған бу хитайларниң хитайдики җинайәт гуруһлири тәрипидин мәхсус һалда америкиға өй сетивелип җинайәт гуруһлириға ишләш үчүн әвәтилгән яки әвәтилмигәнликини тәкшүрмәктикән.

Мәлум болушичә, хитайлар сетивалған калифорнийәдики 100 дәк өйгә елип берилған ахтуруш оператсийәсигә алаһидә һәрикәт әтритини өз ичигә алған 500 нәпәр сақчи вә офитсер қатнашқан. Улар икки күндә 75 өйгә бесип кирип ахтуруш җәрянида 36 миң әпйүн чечики, 115 килограм пишшиқлап ишләнгән әпйүн, 68 миң доллар нәқ пул, 15 данә қорал вә генератор қатарлиқларни қолға чүшүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт