Мутәхәссисләр: “хитайниң фантанилни техиму қаттиқ контрол қилиш вәдисигә еһтиятчан болуш керәк”

Американиң дөләтлик аммиви радийоси (NPR) ға асасланғанда, хитай һөкүмити фантанилни техиму қаттиқ контрол қилиш вәдисини йеңилап, фантанилни контрол қилиш һәққидики йеңи бәлгилимини 1-сентәбирдин башлап йолға қойидиғанлиқини җакарлиған. Лекин мутәхәссисләр хитайниң фантанилни техиму қаттиқ контрол қилишни вәдисигә еһтиятчан болуш һәққидә агаһландурған.

Хәвәргә асасланғанда хитай һөкүмити фантанил ясашта ишлитилидиған химийәлик маддиларни контрол қилишни күчәйтидикән. Фантанилниң америкада һәр йили онмиңлиған адәмниң җениға замин болидиғанлиқи билинмәктә. Шуңа, америка вә хитай мунасивитидә фантанилни техиму қаттиқ контрол қилиш муһим музакирә темиси болмақта.

Мутәхәссисләрниң сөзигә қариғанда, хитайдики химийәлик маддиларни ишләпчиқириш әслиһәлири мексика зәһәрлик чекимлик әткәсчилики вә фантанил вә метафетамин қатарлиқ бирикмә дора ишләпчиқиридиған башқа җинайәт шайкилириниң асаслиқ тәминлигүчисигә айланған. Мутәхәссисләрниң билдүрүшичә, хитай експорт қиливатқан фантанилниң мутләқ көп қисми алди билән мексика портлириға, андин америка шәһәрлиригә елип кирилгән.

Ақсарай дөләт бихәтәрлик мәслиһәтчиси җәйк сулливан пәйшәнбә күни бейҗиңда өткүзүлгән мухбирларни күтүвелиш йиғинида мундақ дегән: “биз зәһәрлик чекимликкә қарши туруш вә қанунсиз бирикмә дориларниң америкаға еқишини тосушта техиму көп илгириләшләр һәққидә издинимиз” .

2023-Йили зәһәрлик чекимликкә қарши туруш сөһбитини әслигә кәлтүрүштин илгири, тәйвән мәсилисидики дипломатик җиддийлик вә кишилик һоқуқ мәсилиси сәвәбидин, хитай америка билән зәһәрлик чекимликкә мунасивәтлик барлиқ һәмкарлиқни тохтатқаниди

Һалбуки, американиң дөләтлик аммиви радийоси (NPR) ниң зияритини қобул қилған зәһәрлик чекимлик сиясити мутәхәссислири хитайниң йеңи фантанил бәлгилимисигә қарита гуманини оттуриға қоюп, хитайниң бу бәлгилимиләрни үнүмлүк иҗра қилишидин гуманлинидиғанлиқини ейтқан.