Хитайда өткүзүлидиған ит гөши фестивалиға қариши 11 милюн имза топланди

Мухбиримиз җүмә
2016.06.11


Хитайда йеқинда өткүзүлидиған ит гөши фестивали башлиништин икки һәптә илгири бир қисим өктичиләр имзалиқ мураҗиәтнамә елан қилип, хитай һөкүмитини мәзкур байрамни әмәлдин қалдурушқа дәвәт қилған.

Б б с ниң хәвәр қилишичә, һайванатларға инсаний муамилә қилиш тәшкилати 11 милйон имза топланған мураҗиәтнамини хитайниң лондонда турушлуқ әлчиханисиға тапшурған.

Гуаңши җуаң аптоном райониға қарашлиқ йүлин шәһиридә өткүзүлидиған ит гөш фестивали 2010 - йилидин буян йолға қоюлған болуп, у шундин кейин дуняви намайишларға сәвәб болуп кәлгән.

Байрам 21 - июн башлинидиған болуп, бу байрамда миңлиған итларниң өлтүрүлүп, базарға селинидиғанлиқи мөлчәрләнгән.

Мәлум болушичә, бу нөвәтлик имза топлаш һәрикитигә баш штаби америкиниң пайтәхти вашингтондики һайванатларға инсаний муамилә қилиш тәшкилати вә хитайдики һайванат һоқуқини қоғдаш паалийәтчилири йетәкчилик қилған.

Һәтта 24 нәпәр хитай паалийәтчи пәйшәнбә күни бейҗиң кочилирида “мән сениң тамиқиң әмәс” дегән хәтләр йезилған плакатларни көтүрүшүп намайиш қилған.

Мәлум болушичә, хитайдиму бу һәқтә бир рай синаш өткүзгән. “ню - йорк вақит гезити” ниң хәвәр қилишичә, бу рай синашни хитай пәнләр академийисидики қануншунас чаң җивен вә униң икки оқуғучиси бирликтә елип барған. Рай синаш нәтиҗиси хитайниң мәркизий телевизийә истансиси торбетигә елан қилған болуп, рай синашқа қатнашқан 64 пирсәнт киши мәзкур фестивални әмәлдин қалдурушни қоллиған.

Мәлум болушичә, бу фестивалға диққәт қилип келиватқан кишиләр, көплигән дөләтләрдә әрмәк һайван һесаблинидиған итларниң хитайда тамақ қатарида өлтүрүлүши вә фестивалидин бурунқи тәйярлиқ җәрянида итларниң хорлинишини болмиғур қилиқ, дәп қарайдикән.

Мәзкур фестивал өткән йилиму хәлқаралиқ намайишларға дуч кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.