Uyghur diyarida omumyüzlük hawa hujumidin mudapi'elinish manéwiri ötküzülidu
2021.09.14
Ötken yillardin buyan Uyghur diyarining bir qisim sheherliride “Hawa hujumidin mudapi'e körüsh manéwiri” sinaq qiliniwatqanidi. 14-Séntebir küni Uyghur aptonom rayonluq hökümet 18-séntebir küni pütün rayon teweside birla waqitta hawa hujumi heqqidiki signalgha inkas qayturush manéwiri ötküzülidighanliqi heqqide uqturush tarqatqan.
“Shinjang géziti” ning bu heqtiki xewiride éytilishiche, 18-séntebir chüsh sa'et 12 de ötküzülidighan bu manéwir ürümchidin xoten'giche bolghan barliq asasliq sheherlerde tengla ötküzülidiken. Shundaqla kishilerni buningdin teshwishlenmeslikke, normal turmush we xizmetni dawam qildurushqa alahide jékiligen.
Emma muhajirettiki analizchilar buningda her xil éhtimalliqning mewjutluqini tekitlidi. Amérikadiki musteqil analizchi ilshat hesen xitay hökümitining eyni waqitta “Sowét ittipaqi hujum qilidu” dégen endishide kishilerni lexme kolash we lexmilerde hawa hujumidin mudapi'elinishke teshkilligenlikini eslitip, “Xitay hökümiti özining düshmenliri bek köp ikenlikini yaxshi bilgechke herqachan mushu xildiki manéwirlargha mohtaj bolup kelmekte” dédi.