Хитай һөкүмити өзиниң 40 йиллиқ иқтисадий тәрәққият тарихида тунҗи қетим өзиниң иқтисадий ешиш нишани бәлгиләштин ваз кәчкәнликини елан қилди. Хитай баш министири ли кечяң 22-май күни хитай хәлқ қурултийиниң мәмликәтлик йиғинида доклат берип, 2020-йили иқтисади тәрәққиятниң ешиш нишанини бәлгилимәйдиғанлиқини җакарлиған. «Җәнубий хитай сәһәр почтиси» гезитиниң хәвәр қилишичә, хитай иқтисади вухәндә партлиған корона вируси юқуминиң бесимида бу йилниң дәсләпки чарикидә 6.8% Төвәнлигән.
Хитай һөкүмити бу йиллиқ иқтисадий ешиш нисбитини бәлгилимигән болсиму, лекин у йәнила һәрбий хам чотини 6.6 %, Бихәтәрлик хам чотини 5.6 % Көпәйткән. Буниң билән хитайниң бу йиллиқ һәрбий хам чоти бир тирилйон 260 милярд йүәнгә чиққан. Ли кечяңниң тәкитлишичә, хитай һөкүмити бу йил корона вируси юқуми, сода-иқтисадниң чекиниши, ишсизлиқ қатарлиқ амиллар сәвәблик бир тирилйон йүәнлик алаһидә зайом тарқитидикән.
У доклатида, «биз йәр шари характерлик юқум, сода-иқтисаттики зор ениқсизлиқ түпәйли конкрет(ички ишләпчиқириш омуми қиммити) нишанини бекитмидуқ. Хитайниң тәрәққияти мөлчәрлигили болмайдиған амилларниң тәсиригә учримақта» дегән. Хитайниң бу нөвәтлик хәлқ қурултийи йиғини хитай вухәндә партлиған корона вирусини «дуняға тарқитип», дуня иқтисадиниң бузғунчилиққа учриши, нурғун инсанниң өлүшигә кәлтүрүп чиқириш билән әйиблиниватқан, униң җавабкарлиқини сүрүштүрүш вә төләм төлиши тәләп қилиниватқан мәзгилдә өткүзүлгәниди.
