Хитай һөкүмити "4-июн вәқәси" ниң һарписида бәзи өктичиләрни нәзәрбәнд қилған
Хитай һөкүмити 4-июн "тйәнәнмен вәқәси"ниң 27 йиллиқ хатирә күни һарписида "тйәнәнмен анилар һәрикити"ниң рәһбири, бейҗиң университетиниң сабиқ профессори дең зилинни нәзәрбәнд қилған.
Атақлиқ хитай өктичи журналист гав йү дүшәнбә күни америка иҗтимаий таратқуси- тветирға учур йоллап, дең зилинниң нәзәрбәнд қилинғанлиқини ашкарилиған. Саламәтлик түпәйли қамақ җазасини аилисидә өтәватқан гав йүниң билдүрүшичә, бейҗиң аманлиқ даирилири дең зилинға 1-июндин башлап униң нәзәрбәнд астиға елинидиғанлиқини уқтурған. Гав йү, дең зилинниң өй телефони үзүп ташланғанлиқини, униң сирт билән болған алақисини сақчи контрол қиливатқанлиқини билдүргән.
Дең зилинниң оғли 1989-йили "тйәнәнмен вәқәси"дә өлгән. Шуниңдин буян у "тйәнәнмен анилар һәрикити"гә рәһбәрлик қилип, "тйәнәнмен вәқәси"ни ақлашни, вәқәдә җавабкарлиқи бар сабиқ баш министир ли пең қатарлиқ хитай рәһбәрлирини сотлашни тәләп қилип кәлгән.
Әмма хитай компартийәси мәзкур вәқәни ақлашни яки дәвагәрләрниң ли пиң қатарлиқ әмәлдарларни сотлашни тәләп қилип, алий тәптиш мәһкимисигә сунған әрзини қобул қилишни изчил рәт қилип кәлгән иди.
Дең зилин башқа аилә тавабиатлар билән биргә, һәр йили қәбрә сүпүрүш қатарлиқ паалийәтләр арқилиқ вәқәдә өлгәнләрни хатириләп кәлгән. У йеқинда өзиниң саламәтлики яр бәрмигәчкә бу йил хатириләшкә қатнишалмайдиғанлиқини билдүргән иди.
- Сәуди әрәбистан һөкүмитиниң һәмдулла вәлийни хитайға қайтуридиғанлиқи илгири сүрүлди
- Адриян зенизниң чамасқа суали: "әгәр сениң ата-анаңму лагерға соланған болса, кариң болмамти?"
- Рәйһан әсәт: "иним әкбәрни вә башқа милйонлиған инсанларни набут қилғанлар җавабкарлиққа тартилидиған күнләр чоқум келиду"
- Тәйвәнлик содигәрниң майтағ һәққидики аччиқ тәсиратлири
- Хитай қазақистанға һәрбий арилишишни қоллап, бихәтәрлик ярдими бериш тәклипи сунған
