Ма шиңрүй уйғур районидики хитай дөләт карханилириниң оттура асия базириға “техиму чоңқурлап сиңип кириши” ни тәләп қилған

Вашингтондин мухбиримиз әркин тәйярлиди
2023.12.04

Уйғур аптоном районлуқ парткомниң секретари ма шиңрүй 2-декабир күни уйғур мәҗбурий әмгикигә четишлиқ “җуңтәй гуруһи” ни өз ичигә алған уйғур районидики хитай дөләт карханилирида тәкшүрүштә болған болуп, дөләт карханилириниң оттура асия базириға “техиму чоңқурлап сиңип кириши” ни тәләп қилған.

“шинҗаң гезити” қатарлиқ райондики хитай һөкүмәт таратқулириниң хәвәрлиридин мәлум болушичә, ма шиңрүй уйғур аптоном районлуқ һөкүмәтниң рәиси әркин туниязниң һәмраһлиқида 2-декабир шинҗаң “яшин” көмүр метан мәбләғ селиш тәрәққият гуруһи, җуңтәй гуруһи, доңчи сода чәклик ширкити қатарлиқ райондики хитай дөләт карханилирида тәкшүрүштә болған. Һалбуки, хитайниң дөләт игиликидики бу карханилар чәт әл тәтқиқат орунлири тәрипидин уйғур мәҗбурий әмгикигә зич бағлинишлиқ, дәп қарилип келиватқан ширкәтләрдур.

Америка ана вәтән хәвпсизлики министирлиқи техи йеқиндила бу карханилардин шинҗаң җуңтәй гуруһини қара тизимликкә киргүзүп, униң мәһсулатлириниң америкаға импорт қилинишини чәклигән иди. “шинҗаң гезити” ниң билдүрүшичә, ма шиңрүй җуңтәй гуруһида тәкшүрүштә болғанда, “әвзәл сода саһәлиригә әһмийәт бериш, давамлиқ тиришип, техникилиқ қоллашни күчәйтиш, киримни ашуруш вә чиқимни азайтишни яхши ишләшниң зөрүрлүки” ни тәкитлигән. Ма шиңрүй шинҗаң доңчи сода чәклик ширкитидә тәкшүрүштә болғанда, карханиларниң “шинҗаңниң орнидин, сиясәттики әвзәлликтин яхши пайдилинип, шинҗаң әркин сода синақ райони қуруш пурситини актиплиқ билән чиң тутуши, шинҗаңни база қилип оттура асияға техиму чоңқурлап сиңип кириши, ‛бир бәлбағ бир йол‚ линийәсидики дөләтләрниң базирини техиму кәң ечиши” ни үмид қилидиғанлиқини ейтқан.

Униң ейтишичә, дөләт игиликидики карханилар “шинҗаңниң дөләт миқясидики истратегийәлик орун әвзәлликигә мәркәзлишиши” , районниң “8 чоң кәсип топи” ниң қурулуш нишаниға әгишиши керәк икән. Һалбуки, адриян зензгә охшаш бу саһәдики мәхсус тәтқиқатчилар, ма шиңрүй дәвридә уйғур мәҗбурий әмгикиниң техиму кеңәйгәнликини қәйт қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.