Xelq'ara pul-mu'amile bazirida xitay pulining kursi chüshüp ketken

Xitay iqtisadining dawamliq chékinishi we amérika merkez bankisining ösüm nisbitini östürüshi netijiside xitay pulining qimmiti 2008-yildiki pul-mu'amile kirzisidin buyan eng töwen nuqtigha chüshüp qalghan.

BBC Torining xewer qilishiche, amérika merkez bankisi aldinqi hepte ösüm nisbitini 0.75 Pirsent östürgendin kéyin dollarning qimmiti ösüp, xitay pulining kursi chüshüp ketken. 28-Séntebir künidiki bahada, xitay pulini dollargha neqleshtürgende bir dollargha 7.2 Yüen toghra kelgen.

Xewerde körsitilishiche, bu ehwal amérika bilen xitayning bir-birige zit iqtisadiy siyaset qollan'ghanliqi bilen munasiwetlik iken. Xitay xelq bankisi kowid seweblik ösümni töwenletken bolsa, amérika merkizi bankisi pul paxalliqini tizginlesh üchün ösümni östürgen.

Xitay pulining qimmiti chüshse xitaygha meblegh salghuchilar meblighini xitaydin chékindürüp, xitayning iqtisadida dawalghush peyda qilidiken؛ forbés torining 27-séntebir küni xewer qilishiche, xitaydiki kompyutér teminligüchi shirketler yasash sana'itini xitaydin yötkep kétishni tézletken. Yene bir jehettin, xitay pulining qimmiti chüshse xitay tashqi sodidin payda alidiken, xitay malliri téximu erzanliship, uninggha bolghan éhtiyaj küchiyidiken.

Xewerde tehlil qilinishiche, xitay ilgiri özining pulini paxallashturush arqiliq amérika bilen bolghan sodida tetür balans peyda qilghan, amérika buni bilsimu, bu qétim dölet ichidiki pul paxalliqini tizginlesh üchün ösüm östürüshke mejbur bolghan.