Хитай дөләтлик путбол командисиниң сүрийәгә уттуруп қоюши хитай топ мәстанилиригә қаттиқ һар кәлгән

Мухбиримиз әркин
2016-10-07
Share

6‏-Өктәбир, дуня путбол лоңқисиниң асия райони гуруппа тәйярлиқ мусабиқиси хитайниң шиән шәһиридә өткүзүлүп, хитай дөләтлик путбол командиси сүрийә командисиға 0 дә 1 уттуруп қойған.

Униң, 4 йиллиқ уруш отида пүтүнләй вәйран болған сүрийәдәк бир дөләткә уттуруп қоюши хитай топ мәстанилиригә қаттиқ һар кәлгән. Нәтиҗидә, онмиңлиған топ мәстаниси шиән тәнтәрбийә мәйданиниң сиртиға йиғилип, хитай путболчилар җәмийитиниң рәиси са җенхуаниң истепа беришини тәләп қилған. Әмма даириләр қораллиқ сақчиларни чиқирип, намайишни контрол қилған һәм ахбаратниң мәзкур һадисини хәвәр қилишини чәклигән.

Келәр нөвәтлик дуня лоңқиси 2018‏-йили русийәдә өткүзүлиду. Шиәндики гуруппа тәйярлиқ мусабиқидә 12 команда риқабәткә чүшкән иди. Сүрийә-хитай командилириниң мусабиқиси башлинип, 54 минут өткәндә сүрийә командиси хитай варитасиға бир топ урувәткән.

Әмма, хитай командиси пүтүн мусабиқидә сүрийә варитасиға қайтуруп бир топ киргүзәлмигән. Бейҗиң санаәт пәнләр университетиниң профессори ху шиңду, җүмә күни радийомизда қилған сөзидә, хитайниң путбол сияситини тәнқидләп, “пуқраларниң җисманий саламәтлики җиддий капаләткә еһтияҗлиқ болуватқан әһвалда, путбол чоң дөлити болушни қоғлишиш биһудә аваричилик” дегән.

Униң қаришичә, хитай путболға салған мәблиғини башланғуч, оттура мәктәп оқуғучилириниң җисманий сапасини яхшилашқа салса яхширақкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт